الیکشن کمیشن کی ڈی جی ایف آئی اے بشیر میمن کے تباد لے کے حوالے سے وضاحت

بدھ 4 جولائی 2018 22:58

اسلام آباد ۔ (اُردو پوائنٹ اخبارتازہ ترین - اے پی پی۔ 04 جولائی2018ء) الیکشن کمیشن نے وضاحت کی ہے کہ ڈی جی ایف آئی اے بشیر میمن کا تبادلہ اس لئے نہیں کیا گیا کہ سیکرٹری اسٹیبلشمنٹ ڈویژن نے آگاہ کیا تھا کہ ڈی جی ایف آئی اے بشیر میمن کو سپریم کورٹ آف پاکستان کے حکم پر اس وقت تک عہدے سے نہیں ہٹایا جا سکتا جب تک ایک اہم انکوائری ختم نہ ہو، الیکشن کمیشن کے حوالہ سے ڈی جی ایف آئی اے کو ہٹانے کے حوالہ سے کوئی کارروائی نہ کئے جانے کا تاثر غلط ہے۔

(جاری ہے)

الیکشن کمیشن کی جانب سے جاری پریس ریلیز کے مطابق الیکشن کمیشن نے 22 جون کو سیکرٹری اسٹیبلشمنٹ ڈویژن کو مراسلہ ارسال کیا تھا کہ ایف آئی اے، سی ڈی اے اور آئی بی میں بھی اعلیٰ سطح پر تبادلوں کی تجویز دی جائے جس پر 23 جون کو سیکرٹری اسٹیبلشمنٹ ڈویژن نے آگاہ کیا کہ ڈی جی ایف آئی اے بشیر میمن کو سپریم کورٹ آف پاکستان کے حکم پر اس وقت تک عہدے سے نہیں ہٹایا جا سکتا جب تک ایک اہم انکوائری ختم نہ ہو۔