کراچی میں چیئرمین عمران خان کی آمد ہوا کا خوشگوار جھونکا ثابت ہوئی،نجیب ہارون

جمعرات 5 جولائی 2018 17:21

کراچی (اُردو پوائنٹ اخبارتازہ ترین - این این آئی۔ 05 جولائی2018ء) پاکستان تحریک انصاف کی طرف سے حلقہ این اے 256 کے نامزد امیدوار نجیب ہارون نے کہا ہے کہ کراچی میں چیئرمین عمران خان کی آمد ہوا کا خوشگوار جھونکا ثابت ہوئی، کراچی میں بادل بھی آئے اور بارش بھی برسی۔ پی پی کے بلاول بھٹو پر پتھر برسائے گئے جس کی ہم مذمت کرتے ہیں لیکن بلاول بھٹو کو بھی کراچی آتے ہوئے احتیاط کرنی چاہئے۔

(جاری ہے)

انہوں نے یہ باتیں اپنے حلقہ انتخاب میں انتخابی مہم کے دوران علاقہ مکینوں اور پی ٹی آئی کارکنان سے بات چیت کرتے ہوئے کہیں۔ اس موقعے پر حلقہ پی ایس 129 کے نامزد امیدوار ڈاکٹر عمران شاہ اور حلقہ 130 کے نامزد امیدوار ریاض حیدر بھی ان کے ساتھ موجود تھے۔ انہوں نے مزید کہا کہ اب اندرونِ سندھ بھی پی پی کا زور نہیں رہا، کراچی تو پھر کراچی ہے۔ دس سال تک سندھ پر آپ نے حکومت کی اور سندھ اور کراچی کا برا حال کردیا۔ پاکستان تحریک انصاف اس تمام محرومی اور پریشانی کو ختم کرنے نکلی ہے۔ کراچی، سندھ اور پورے پاکستان کے عوام پاکستان تحریک انصاف اور چیئرمین عمران خان کے ساتھ ہیں۔