ملتان ائیر پورٹ پر اے این ایف کی کاروائی ، مسافر سے 815 گرام ہیروئن برآمد، ساتھی سمیت گرفتار

پیر 9 جولائی 2018 12:40

ملتان(اُردو پوائنٹ اخبارتازہ ترین - آئی این پی۔ 09 جولائی2018ء) ملتان ائیر پورٹ پر اینٹی نار کوٹکس فورس نے کارروائی کرتے ہوئے بحرین سے آنے والے مسافر سے ہیروئن برآمد کرکے مذکورہ شخص کو اس کے ساتھی سمیت گرفتار کرلیا۔

(جاری ہے)

تفصیلات کے مطابق ملتان ائیر پورٹ پر بحرین سے آنے والی گلف ائیر لائن کی پرواز 789 کے مسافر فیاض رسول سے دوران چیکنگ 815 گرام ہیروئن برآمد ہوئی جس پر اے این ایف حکام نے اسے گرفتار کر لیا۔

اینٹی نار کوٹکس فورس حکام کے مطابق فیاض رسول کا تعلق وہاڑی کے علاقے فیصل کالونی سے ہے، جبکہ ائیر پورٹ کے لاونج میں موجود فیاض رسول کے ساتھی غلام عباس کو بھی گرفتار کر لیا گیا ہے۔غلام عباس کا تعلق شیخوپورہ سے ہے، دونوں گرفتار افراد کو اے این ایف سرکل آفس منتقل کر دیا گیا ہے۔