پشاور میںاے این پی کی کارنر میٹنگ میں بم دھماکہ کی شدید مذمت کرتے ہیں،آفاق احمد

ہارون بلور کی شہادت پر بلور خاندان اور اے این پی کے دکھ میں برابر کے شریک ہیں،چیئرمین مہاجر قومی موومنٹ

بدھ 11 جولائی 2018 15:30

کراچی (اُردو پوائنٹ اخبارتازہ ترین - این این آئی۔ 11 جولائی2018ء) مہاجر قومی موومنٹ (پاکستان) کے چیئرمین آفاق احمد نے پشاور میں اے این پی کی کارنر میٹنگ میں بم دھماکہ کی شدید مذمت اور قیمتی جانی نقصان پر گہرے دکھ اور افسوس کا اظہار کیا ہے۔اپنے مذمتی بیان میں آفاق احمد نے کہا کہ پشاور دھماکہ الیکشن سبوتاژ کرنے کی سازش ہے جسے ناکام بنانا ریاست اور ریاستی اداروں کی ذمہ داری ہے۔

آفاق احمد نے کہا کہ بلور خاندان اس سے پہلے بھی دکھ اٹھا چکا ہے ، ہارون بلور کی شہادت پر بلور خاندان اور اے این پی کے دکھ میں برابر کے شریک ہیں۔ آفاق احمد نے کہا کہ برسوں سے نیشنل ایکشن پلان اور آہنی ہاتھوں سے نمٹنے جیسے بیانات سنتے چلے آرہے ہیں لیکن دہشت گردہیں کہ ختم ہی نہیں ہورہے، سوال یہ پیدا ہوتا ہے کہ جب انتخابی عمل میں شریک افراد اور سیاستدان ہی غیر محفوظ ہیں تو پھر انتخابات کا کیا ہوگا ۔

(جاری ہے)

آفاق احمد نے کہا عوام کو تحفظ فراہم کرنا ریاست کی ذمہ داری ہوتی ہے جس میں اس وقت ریاست ناکام نظر آرہی ہے ، جب تک ریاست کی رٹ چیلنج کرنے والے دہشت گردوں کو ختم نہیں کیا جاتا تب تک انتخابات کے پرامن انعقاد پر سوالیہ نشان لگا رہے گا۔آفاق احمد نے شہداء کے لواحقین سے اظہار ہمدردی کرتے ہوئے دعا کہ اللہ شہدا ء کو جنت الفردوس میں اعلیٰ مقام عطا فرمائے۔