سلمان خان کے ٹی وی گیم شو ’’دس کا دم ‘‘ کی ریٹنگ کم

اتوار 15 جولائی 2018 14:20

ممبئی۔15 جولائی(اُردو پوائنٹ اخبارتازہ ترین - اے پی پی۔ 15 جولائی2018ء) بالی وڈ اداکار سلمان خان کے ٹی وی گیم شو ’’دس کا دم ‘‘ کی کم ریٹنگ کے باعث شو کو ہفتے کے آخر میں دکھانے پر غور کیا جارہا ہے۔

(جاری ہے)

بھارتی ذرائع ابلاغ کے مطابق اداکار سلمان خان کی میزبانی میں ڈیڑھ گھنٹے کے دورانیے پر مشتمل ٹی وی گیم شو ’’دس کا دم ‘‘ کا آغاز بہت کم ریٹنگ 1.1 سے ہوا جس کے باعث شو کے میکرز اس کا دورانیہ ایک گھنٹہ کرنے اور اسے ویک ڈیز میں دکھانے کے بجائے ہفتے کے آخر میں دکھانے پر غور کر رہے ہیں۔

اس سلسلے میں بالی وڈ اداکاروں کو بھی شو میں بطور مہمان خصوصی اور فلموں کی تشہیر کے لیے شریک کرنے کی منصوبہ بندی کی جارہی ہے،اداکار شاہ رخ خان شو کی آخری قسط میں خصوصی شرکت کریں گے۔اداکارہ کاجل اور ریکھا سے بھی اس سلسلے میں بات کی جارہی ہے لیکن کاجل ان دنوں لندن میں ہیں اور 5 اگست کو اپنی سالگرہ منانے کے بعد ممبئی واپس آئیں گی جس کے بعد سلمان خان اگست کے وسط میں شو کی عکسبندی کریں گے۔