فغانستان ،نامعلوم مسلح افراد نے ایک سکول کو آگ لگا دی، عمارت مکمل تباہ ، دستاویزات اور کتابیں جل گئیں

کابل (اُردو پوائنٹ اخبارتازہ ترین - آئی این پی۔ 15 جولائی2018ء) نامعلوم مسلح افراد نے افغانستان کے صوبہ ننگر ہار میں ایک اسکول کو آگ لگا دی ،جلنے کے بعد سکول کی عمارت مکمل طور پر تباہ ہو گئی، عمارت کے اندر موجودتمام دستاویزات اور کتابیں جل گئیں۔ اتوار کو افغان حکومت کے روز جاری کیے گئے بیان کے مطابق نامعلوم مسلح افراد نے ہفتے کی درمیانی شب ضلع بتی کوٹ کے کیپتان بابا مڈل اسکول کو آگ لگا کر جلا دیاہے ۔

(جاری ہے)

جلنے کے بعد سکول کی عمارت مکمل طور پر تباہ ہو گئی جبکہ عمارت کے اندر موجودتمام دستاویزات اور کتابیں بھی جل گئیں۔ معلوم ہوا ہے کہ مذکورہ ا سکول کے طالب علموں کی تعداد آٹھ سو سے زائد ہے ۔ ابھی تک کسی تنظیم نے اس واقعے کی ذمہ داری قبول نہیں کی ، تاہم طالبان اور داعش کے مسلح دستے اس علاقے میں سرگرم ہیں ۔ افغان تعلیمی شعبے کے ایک اہل کار نے کہا کہ اس وقت پچانوے لاکھ افغان بچے ملک بھر کے پندرہ ہزار سکولوں میں زیر تعلیم ہیں جن میں سے لڑکیوں کی تعداد چالیس فیصد ہے ۔ تاہم غربت ، تصادم اور لڑائیوں کی وجہ سے پینتیس لاکھ بچیتعلیم حاصل کرنے سے محروم ہیں۔