آنے والا وقت تحریک انصاف کا ہے، الیکشن میں جیت کے لیے پراعتماد ہوں ،ْعمران خان

منگل 17 جولائی 2018 14:32

اسلام آباد (اُردو پوائنٹ اخبارتازہ ترین - این این آئی۔ 17 جولائی2018ء) پاکستان تحریک انصاف کے چئیرمین عمران خان نے کہا ہے آنے والا وقت تحریک انصاف کا ہے، الیکشن میں جیت کے لیے پراعتماد ہوں۔ انہوں نے کہا نواز شریف اور آصف زرداری کرپشن کی علامت ہیں۔عمران خان نے عرب نیوز کو انٹرویو میں کہا کہ 25 جولائی کو ہونے والے انتخابات میں جیت کے لیے وہ پراعتماد ہیں، تحریک انصاف نے بہترین انتخابی مہم چلائی ہے، اب وقت ہمارا ہوگا۔

(جاری ہے)

چیئرمین پی ٹی آئی نے کہا پاکستان میں فوج واحد ادارہ ہے جو شفاف طریقے سے کام کررہا ہے، دیگر ریاستی ادارے کرپشن نے تباہ کر دیئے ہیں۔ انہوں نے کہا پی ٹی آئی، پیپلز پارٹی اور نون لیگ میں جو بھی چوری کرے اسے جیل میں ڈالنا چاہئے۔سابق وزیراعظم نواز شریف کی سزا پر عمران خان نے کہا کہ پہلی بار کسی طاقتور کو قانون کے مطابق سزا دی گئی، یہ پاکستان کی بڑی کامیابی ہے۔ عمران خان نے کہا کہ پاکستان کے سعودی عرب کے ساتھ تعلقات بہت خاص ہیں، وزیراعظم منتخب ہو کر تعلقات کو مزید فروغ دیں گے، امریکا سے باہمی مفاد کاتعلق چاہتے ہیں۔