نیشنل فوڈز لمٹیڈ نے ٹریل بلیزرز پروگرام متعارف کرا دیا

کراچی (اُردو پوائنٹ اخبارتازہ ترین - این این آئی۔ 17 جولائی2018ء) انڈسٹری کے آپریشنز میں انقلاب لانے اور ٹاپ ٹیلنٹ بھرتی کرنے کی غرض سے نیشنل فوڈز لمٹیڈ نے اپنا ٹریل بلیزرز (Trailblazers) پروگرام متعارف کرا دیا ہے۔ٹریل بلیزرز ایک منیجمنٹ ٹرینی پروگرا م ہے جس کے ذریعے پاکستان اور عالمی مارکیٹ سے طلباء کو بھرتی کیا جا ئے گا۔ادارے کے خاص خاص شعبوں میں بھرتی کی صورت میں یہ پروگرام مستقبل کی جنریشن زی (Generation Z) کے لیے راہ ہموار کرے گا۔

یہ پروگرام اس یقین پر کام کرتا ہے کہ نئی نسل اپنا راستہ خود متعین کرنے کی صلاحیت رکھتی ہے۔ منتخب کیے گئے ٹریل بلیزرزکو دو پروجیکٹس دئیے جائیں گے جن میں سے ایک پروجیکٹ انتظامیہ کی جانب سے دیا جائے گا جبکہ دوسرے پروجیکٹ کا انتخاب وہ خود کریں گے۔

(جاری ہے)

ادارے میں ان کی ترقی ان دونوں پروجیکٹس کی کارکردگی اور اثرات کی بنیاد پر ہو گی۔"اس پروگرام کے فوائد بیان کرتے ہوئے نیشنل فوڈز لمٹیڈ کے چیف ایگزیکٹو آفیسر، ابرار حسن نے کہا:’’ہمیں انڈسٹری کے مستقبل اور پاکستان کی معیشت کو مد نظر رکھتے ہوئے انفرادی حیثیت میں مثبت کردار ادا کرنا چاہیے۔

عالمی مارکیٹ میں اپنا مقام بنانے کے لیے ہمیں اپنے کاروبار ی آپریشنز میں جنریشن زی کو شامل کرنے کی ضرورت ہے کیوں کہ ان کے پاس مارکیٹ میں انقلاب برپا کرنے اور ہمیں نئی بلندیوں تک لے جانے کی مطلوبہ صلاحیت موجود ہے۔ نیشنل فوڈز لمٹیڈ ہمیشہ ایک ٹریل بلیزر رہی ہے اور ہم مارکیٹ میں دستیاب بہترین وسائل کو سامنے لانے کے لیے پر عزم ہیں۔‘‘اس سلسلے میں نیشنل فوڈز لمٹیڈ نے میٹل (Mettl) کے ساتھ تعاون کیا ہے۔

میٹل ، ایک کنسلٹنسی کمپنی تار (Taar) کااسیسمنٹ سینٹر ہے۔اس اسیسمنٹ سینٹر کے ذریعے نیشنل فوڈز مکمل طور پر آن لائن ٹیسٹنگ کا طریقہ استعمال کرے گا۔ان ٹیسٹوں کو اس طرح تیار کیا گیا ہے کہ مکمل تفصیل، مسائل کے حل اور باریک بینی سے سوچنے کی صلاحیت، ڈیٹا کا تجزیہ کرنے اور تجزیاتی فکر کی جامع پڑتا ل کے بعد ادارے کے لیے انتہائی موزوں افراد کا انتخاب کیا جا سکے۔

اس پروگرام کے تحت تقریباً 3000 درخواستوں میں سے 2100 درخواست گزاروں کو آن لائن تجزیاتی ٹیسٹ کے لیے منتخب کیا گیا اور 70 فیصد درخواست گزاروں کی شرکت کو یقینی بنایا گیا۔پاکستان میں دستیاب ٹاپ ٹیلنٹ کاانتخاب یقینی بنانے کے لیے ہر ٹریل بلیزرایک سخت انتخابی مرحلے سے گزرے گا۔ رجحان کو جانچنے کے آن لائن ٹیسٹ کے بعد منتخب کیے گئے 36 افراد کو 6 گروپوں میں تقسیم کیا جائے گا جہاں گروہی مذکرات میں ان کی شرکت ، ٹائم منیجمنٹ ، تجزیاتی منصوبہ بندی، حکمت عملی سے متعلق ان کی مہارت، جدید حل، کمیونیکشن اور پریزنٹیشن کا مشاہدہ کیا جائے گا۔