اسلام آباد چیمبر آف کامرس اینڈ انڈسٹری کے وفد کا جدہ میں پاکستان کے کونصلیٹ جنرل کا دورہ

اسلام آباد (اُردو پوائنٹ اخبارتازہ ترین - این این آئی۔ 17 جولائی2018ء) اسلام آباد چیمبر آف کامرس اینڈ انڈسٹری کے ایک تین رکنی وفد نے چیمبر کے سینئر نائب صدر محمد نوید ملک کی قیادت میںسعودی عرب کے شہر جدہ میں پاکستان کے کونصلیٹ جنرل کا دورہ کیا اور قائم مقام کونسل جنرل شائق احمد بھٹو سے ملاقات کی۔ وفد میں محمد فہیم خان اور محمد اشفاق چھٹہ بھی شامل تھے۔

شائق احمد بھٹو نے وفد کا پرتپاک استقبال کیا اور سعودی عرب کے ساتھ دوطرفہ تجارت کو بہتر کرنے کیلئے سعودی عرب کا دورہ کرنے پر وفد کی کوششوں کو سراہا۔ وفد سے خطاب کرتے ہوئے شائق احمد بھٹو نے کہا کہ سعودی عرب ویژن 2030کے تحت اپنی معیشت میں بہت سی اصلاحات لا رہا ہے اور اس مقصد کیلئے وہ ایسی انٹرنیشنل کمپنیوں کی تلاش میں ہے جو سعودی عرب کی کمپنیوں کے ساتھ کاروباری شراکتیں قائم کرنے میں دلچسپی رکھتی ہوں۔

(جاری ہے)

انہوں نے کہا کہ پاکستان کیلئے یہ ایک اچھا موقع ہے کہ وہ سعودی عرب کے ساتھ تجارتی و اقتصادی تعلقات کو مزید مضبوط کرنے کی کوشش کرے۔ انہوں نے کہا کہ چیمبر اپنا ایک بڑا وفد سعودی عرب کیلئے ترتیب دے تا کہ دونوں ممالک کے درمیان مشترکہ تعاون کی نئی راہیں تلاش کی جا سکیں۔ انہوں نے یقین دہانی کرائی کہ جدہ میں پاکستان کا کونسلیٹ جنرل ان کوششوں میں چیمبر کے ساتھ بھرپور تعاون کرے گا۔

کونسلیٹ کے کمرشل سیکشن کے ٹریڈ ڈیولپمنٹ آفیسر فہد چوہدری نے وفد کو سعودی عرب میں پاکستان کیلئے پائے جانے والے کاروباری مواقعوں کے بارے میں تفصیلی بریفنگ دی۔ انہوں نے کہا کہ سعودی عرب فوڈ پراڈیکٹس، گوشت، مچھلی، ٹیکسٹائل مصنوعات، احرام، آٹو پارٹس اور لائٹ مشینری سمیت متعدد مصنوعات بڑی تعداد میں باہر سے درآمد کرتا ہے اور پاکستان کا نجی شعبہ ایک خاص حکمت عملی وضع کر کے سعودی عرب کے ساتھ ان مصنوعات کی برآمدات کو بہتر فروغ دے سکتا ہے۔

اس موقع پر خطاب کرتے ہوئے اسلام آباد چیمبر آف کامرس اینڈ انڈسٹری کے سینئر نائب صدر محمد نوید ملک نے کہا کہ چیمبر جدہ میں پاکستان کے کونسلیٹ جنرل کے ساتھ مل کر سعودی عرب کے ساتھ پاکستان کی تجارت کو مزید بہتر طور پر فروغ دینے کی کوشش کرے گا۔ انہوں نے کہا کہ چیمبر ستمبر 2018میں سعودی عرب کیلئے اپنا ایک بڑا وفد ترتیب دینے کی کوشش کرے گا جس میں فوڈ پراڈیکٹس، ٹیکسٹائل، فیشن گارمنٹس، انجینئرنگ گڈز، آلات جراحی اور کھیلوں کا سامان تیار کرنے والے نمائندگان شامل ہوں گے۔ انہوں نے وفد کا شاندار استقبال کرنے اور ان کی بہتر مہمان نوازی کرنے پر جدہ میں پاکستان کے قائم مقام کونسل جنرل کا شکریہ ادا کیا اور چیمبر کی طرف سے ان کو ایک شیلڈ پیش کی۔