فٹ بال ورلڈ کپ سیالکوٹ کی معروف کمپنی TELSTAR-18 سے کھیلا گیا جو سیالکوٹ کی سپورٹس انڈسٹری کیلئے بہت بڑا اعزاز ہے، زاہد لطیف ملک

بدھ 18 جولائی 2018 00:02

فٹ بال ورلڈ کپ سیالکوٹ کی معروف کمپنی TELSTAR-18 سے کھیلا گیا جو سیالکوٹ ..
سیالکوٹ۔17جولائی(اُردو پوائنٹ اخبارتازہ ترین - اے پی پی۔ 17 جولائی2018ء) روس میں ہونے والا فٹ بال ورلڈ کپ سیالکوٹ کی معروف کمپنی کے تیار کردہ فٹبال TELSTAR-18 سے کھیلا گیا جو سیالکوٹ کی سپورٹس انڈسٹری کیلئے ایک بہت بڑا اعزاز ہے۔گزشتہ دنوں ایوان صنعت و تجارت سیالکوٹ میںایک شاندار تقریب کا اہتمام کیا گیا جس میں سیالکوٹ کی کاروباری برادری سمیت کمپنی کے مالک خواجہ مسعود اختر سمیت ان کی فیملی نے خصوصی شرکت کی۔

تقریب میں سیالکوٹ چیمبر کی تاریخ میں پہلی بار اس شاندار پرفارمنس پر خواجہ مسعود اختر کو گولڈ میڈل سے نوازا گیا۔ایوان صنعت و تجارت سیالکوٹ کے صدر زاہد لطیف ملک نے تقریب سے خطاب کرتے ہوئے کہا کہ فارورڈ گروپ کے تیار کردہ فٹبال "Telstar 18"نے پوری دنیا میں سیالکوٹ کی سپورٹس انڈسٹری کی نمائندگی کرتے ہوئے پاکستان کا نام روشن کیا جو کسی اعزاز سے کم نہیں ہے۔

(جاری ہے)

انہوں نے کہا سیالکوٹ چیمبر کی تاریخ میں پہلی بار ایسا ہو رہا ہے کہ سیالکوٹ چیمبرکسی انڈسٹری کو اس کی شاندار کارکردگی پر گولڈ میڈل دیا جا رہا ہے۔ انہوں نے مزید کہا کہ یہ سلسلہ آئندہ بھی جاری رہے گا جو انڈسٹری اپنی غیر معمولی کارکردگی کا مظاہرہ کرے گی اس کو بھی ایسے ہی پروقار تقریب میں گولڈ میڈل دیا جائے گا۔تقریب سے خطاب کرتے ہوئے خواجہ مسعود اختر نے صدر چیمبر زاہد لطیف ملک کا شکریہ ادا کرتے ہوئے کہا کہ سیالکوٹ چیمبر کی جانب سے گولڈ میڈل کا ملنا میرے لئے بہت اعزاز کی بات ہے۔

انہوں نے کہا کہ Telstar-18اب تک کا دنیا میں تیار کیا جانے والا سب سے بہترین فٹبال ہے، اس کامیابی کے حصول کے پیچھے میری ریسرچ اینڈ ڈویلپمنٹ ٹیم کی شبانہ روز محنت شامل ہے۔انہوں مزید کہا کہ سیالکوٹ کی انڈسٹری کی ترقی کیلئے جدید ٹیکنالوجی کا حصول وقت کی اہم ضرورت ہے۔