پشاورہائیکورٹ کے بی آر ٹی منصوبے کی تحقیقات کیلئے نیب کو احکامات ،ْ 5 ستمبر تک رپورٹ جمع کرانے کی ہدایت

جمعرات 19 جولائی 2018 16:10

پشاور(اُردو پوائنٹ اخبارتازہ ترین - این این آئی۔ 19 جولائی2018ء) پشاورہائیکورٹ نے بی آر ٹی منصوبے کی تحقیقات کے لیے نیب کو احکامات جاری کرتے ہوئے 5 ستمبر تک رپورٹ جمع کرانے کی ہدایت کی ہے۔

(جاری ہے)

پشاور ہائیکورٹ نے بی آر ٹی پر محفوظ فیصلہ سنا دیا ہے جس کے مطابق بی آر ٹی منصوبے کی ابتدائی لاگت 49.3 ارب روپے لگائی گئی تھی جو 24 جون 2018 تک مکمل ہونا تھا مگر اب اس منصوبے کی لاگت 68 ارب روپے تک پہنچ گئی ہے، جس فرم کو ٹھیکا دیا گیا تھا وہ فرم دوسرے صوبوں میں بلیک لسٹ ہے۔

دیگر عوامی منصوبوں سے فنڈز قواعد کے خلاف نکال کر بی آر ٹی منصوبے میں لگائے گئے جب کہ بی آر ٹی کے لیے باقاعدہ پلاننگ بھی نہیں کی گئی تھی۔پراجیکٹ ڈائریکٹر ڈی جی پی ڈی اے اسرار الحق کا تبادلہ نہ کرنے کا حکم دیا گیا تھا مگر ان کا تبادلہ کر دیا گیا، عدالت نے ڈی جی پی ڈی اے کے تبادلے پر عائد پابندی ہٹاتے ہوئے نیب کو بی آر ٹی منصوبے کی باقاعدہ تحقیقات کرکے رپورٹ 5 ستمبر تک جمع کرانے کا حکم دیا ہے۔