مستونگ خودکش حملہ آور کی شناخت کرلی گئی، آئی جی بلوچستان

دہشت گردی کا واقعہ داعش کی کارروائی ہے، حملہ آور کا نام حافظ نواز ،تعلق ایبٹ آباد سے تھا، آئی جی بلوچستان کی سینیٹ کی قائمہ کمیٹی داخلہ کو بریفنگ

جمعرات 19 جولائی 2018 18:58

مستونگ خودکش حملہ آور کی شناخت کرلی گئی، آئی جی بلوچستان

کوئٹہ(اُردو پوائنٹ اخبارتازہ ترین - این این آئی۔ 19 جولائی2018ء) انسپکٹر جنرل پولیس بلوچستان محسن حسن بٹ نے کہاہے کہ مستونگ میں خودکش حملہ کرنے والے دہشت گرد کی شناخت کرلی ہے۔یہ بات انہوں نے سینیٹ کی قائمہ کمیٹی برائے داخلہ کو جمعرات کے روزبریفنگ کے دوران بتائی ،آئی جی بلوچستان نے کہاہے کہ مستونگ میں دہشت گردی کا واقعہ داعش کی کارروائی ہے اور خودکش حملہ آور کا نام حافظ نواز ہے اور اس کا تعلق ایبٹ آباد سے تھا۔

نجی ٹی وی کے مطابق آئی جی بلوچستان کے مطابق خودکش حملہ آور ایبٹ آباد سے سندھ گیا جہاں وہ کالعدم تنظیموں سے رابطے میں رہا اور وہ لشکر جھنگوی میں بھی رہا جب کہ حملہ آور کے سہولت کاروں کا بھی پتہ چلا لیا گیا ہے۔آئی جی بلوچستان نے کہا کہ مفتی حیدر اور حافظ نعیم داعش کے مقامی کمانڈر ہیں جنہیں گرفتار کرنے کی کوشش کررہے ہیں۔

(جاری ہے)

مستونگ میں خودکش دھماکا، بی اے پی امیدوار سراج رئیسانی سمیت 128 سے زائد افراد شہیدہوئے تھے ،آئی جی بلوچستان نے بریفنگ کے دوران مزید بتایا کہ افغانستان میں داعش نے کنٹرول سنبھال لیا ہے جہاں سے وہ بلوچستان بھی آگئے ہے۔

یاد رہے کہ 13 جولائی کوضلع مستونگ میں بلوچستان عوامی تحریک کی انتخابی مہم میں خودکش حملے کے نتیجے میں نوابزادہ سراج رئیسانی سمیت 149 افراد شہید اور درجنوں زخمی ہوگئے تھے۔