شفاف انتخابات کیلئے تمام انتظامات مکمل کرنانگران حکومتوں اور الیکشن کمیشن کی ذمہ داری ہے ،لیفٹیننٹ جنرل (ر) عبدالقیوم

چکوال (اُردو پوائنٹ اخبارتازہ ترین - این این آئی۔ 20 جولائی2018ء) چیئرمین دفاعی پیدوار سینیٹ کمیٹی لیفٹیننٹ جنرل (ر) عبدالقیوم نے کہا ہے کہ نگران حکومتوں اور الیکشن کمیشن کی ذمہ داری ہے کہ وہ شفاف انتخابات کیلئے تمام انتظامات مکمل کرے ، اب اگر شفافیت کے بارے میں انگلیاں اٹھ رہی ہیں تو ضرورت ہے کہ تمام ادارے شفاف انتخابات کیلئے اپنی ذمہ داریاں پوری کریں ، الیکشن شفاف نہ ہوئے تو ملک کو ناقابل تلافی نقصان ہو گا۔

چکوال پریس کلب کے پروگرام میٹ دی پریس میں اظہار خیال کرتے ہوئے لیفٹیننٹ جنرل (ر) عبدالقیوم نے کہا کہ سیاسی جماعتوں کی اصلی طاقت صرف اور صرف عوامی پذیرائی ہی ہوتی ہے جس کے حصول کا واحد طریقہ وہ کار کارکردگی ہے جس سے عام آدمی مستفید ہو سکے۔ اداروں کے کندھوں کے متلاشی نام نہاد سیاسی قائدین ماضی کے ان تجربات کو بھول جاتے ہیں کہ اس طرح سے اقتدار کے حصول کے بعد سیاسی جماعتیں نہ صرف اپنی حکومتی ساکھ کھو بیٹھتی ہیں بلکہ اپنی بصیرت سے ہٹ کر اس منشور پر چلنے پہ مجبور ہو جاتی ہیں جو ان کو دیا جاتا ہے اس طرح وہ ملک کے نہایت اہم اور پاکیزہ اداروں کو متنازع بنا کر اور ان کی ساکھ کو داغدار کرنے کی مضموم کوشش میں ملک کی سلامتی کو شدید خطرات سے لا حق کر دیتی ہیں اس لیے سب جماعتوں سے استدعا ہے کہ اگر آئین کی پاسداری اور جمہوریت کی مضبوطی پاکستان کی بقا کی ضامن ہے تو پھر ان اصولوں کو اپنی محدود سیاسی سوچ اور ہوس اقتدار کی بھینٹ نہ چڑھائیں مسلم لیگ ن بغیر شک کے پاکستان کی سب سے بڑی اور مقبول ترین جماعت ہے جس نے ماضی میں ہر پارٹی کے مینڈیٹ کو کھلے دل سے قبول کیا اور آئندہ بھی کرینگے ہم سیاسی مخاصمت کو ذاتی دشمنی میں تبدیل کرنے کے خلاف ہیں شہبازشریف کی قیادت میں مسلم لیگ (ن) کی پوزیشن صرف چکوال میں نہیں بلکہ پورے پنجاب میں مضبوط ہے اور جو جماعت پنجاب میں نا قابل شکست ہے وہ مرکز میں بھی ناقابل شکست ہے ۔

(جاری ہے)

جنرل عبدالقیوم نے مزید کہا کہ افواج پاکستان ملک کا اثاثہ ہیں اور ہمیں اپنی افواج پر فخر ہے اور اس حوالے سے افواج پاکستان پر بھی یہ بھاری ذمہ داری ہے کہ وہ شفاف انتخابات کروانے کیلئے اپنا کردار ادا کریں ۔