سی پیک سے روزگار کے 8 لاکھ سے زائد مواقع پیدا ہوں گے، چین پاکستان اقتصادی راہداری منصوبہ نے دونوں ممالک کے تزویراتی شراکت داری کو نئی عملی جہت دی ہے، سی پیک کے تحت توانائی اور بنیادی ڈھانچے کے شعبوں سے پاکستان مستفید ہو رہا ہے

اسلام آباد ۔ (اُردو پوائنٹ اخبارتازہ ترین - اے پی پی۔ 21 جولائی2018ء) نگراں وزیر خارجہ عبداللہ حسین ہارون نے کہا ہے کہ سی پیک سے روزگار کے 8 لاکھ سے زائد مواقع پیدا ہوں گے، چین پاکستان اقتصادی راہداری منصوبہ (سی پیک) نے دونوں ممالک کے تزویراتی شراکت داری کو نئی عملی جہت دی ہے، سی پیک کے تحت توانائی اور بنیادی ڈھانچے کے شعبوں سے پاکستان مستفید ہو رہا ہے۔

جمعہ کو وزارت خارجہ میں ایک سڑک ایک خطہ (بی آر آئی) اور سی پیک کے حوالے سے منعقدہ ایک تقریب سے خطاب کرتے ہوئے انہوں نے کہا کہ پاکستان اور چین کے باہمی تعلقات دنیا کے لئے ایک روشن مثال ہیں اور چین کے صدر ژی جن پنگ کے بی آر آئی نظریہ کے تحت سی پیک ایک مثالی منصوبہ ہے۔ برطانیہ کے گری سنز پیک انویسٹمنٹ بینک کے چیئرمین اور سی ای او ہینری ٹل مین جو بی آر آئی اور سی پیک سمیت دیگر چینی اقتصادی اقدامات پر اتھارٹی سمجھے جاتے ہیں نے کہا کہ سی پیک ایک اہم اور تاریخی منصوبہ ہے۔

(جاری ہے)

انہوں نے وزیر خارجہ سے اتفاق کرتے ہوئے کہا کہ سی پیک اور بی آر آئی منصوبوں کی اقتصادی کامیابیاں نمایاں ہیں۔ انہوں نے کہا کہ سی پیک سے پاکستان توانائی اور بنیادی ڈھانچہ کے شعبہ میں خصوصی فوائد حاصل کر رہا ہے۔ انہوں نے کہا کہ منصوبہ کے تحت بجلی پیدا کرنے اور سڑکوں کی تعمیر کے کئی منصوبے مکمل ہو چکے ہیں جبکہ دیگر کئی تکمیل کے مراحل میں ہیں۔

انہوں نے کہا کہ سی پیک سے روزگار کے 8 لاکھ سے زائد مواقع پیدا ہوں گے جبکہ بی آر ائی اور سی پیک کے تحت پاکستان میں براہ راست غیر ملکی سرمایہ کاری میں بھی نمایاں اضافہ ہوگا، اس کے علاوہ پاکستان کے تعمیرات، مینوفیکچرنگ، سیاحت اور ای کامرس کے شعبوں کی ترقی میں بھی اضافہ ہوگا۔ انہوں نے کہا کہ سی پیک کے تحت مخصوص اقتصادی زونز کے قیام سے استفادہ کی ضرورت ہے جہاں پر بین الاقوامی سرمایہ کار پہلے ہی سرمایہ کاری کر رہے ہیں۔

انہوں نے کہا کہ ایسی ای ٹریڈز پاکستان کی صنعتی اور اقتصادی ترقی کو چار چاند لگا دیں گے۔ سی پیک کی کامیابی کی تعریف کرتے ہوئے انہوں نے کہا کہ کئی بڑی کمپنیاں پاکستان آ رہی ہیں جس سے نئی سرمایہ کاری بڑھ رہی ہے۔ انہوں نے کہا کہ چین کے صدر نے سی پیک پر 60 ارب ڈالر کی سرمایہ کاری کیلئے پاکستان پر اعتماد کا اظہار کیا ہے۔ تقریب کا انعقاد پاکستان کی معیشت اور علاقائی رابطوں کے فروغ کے حوالے سے سی پیک کے مثبت اثرات کو اجاگر کرنے کیلئے کیا گیا۔

تقریب میں نگران وزیر خزانہ ڈاکٹر شمشاد اختر، وزیر قانونو انصاف سید علی ظفر، چین کے سفیر ژائو جنگ، پاکستان میں کام کرنے والی چینی کمپنیوں کے سربراہوں اور اعلی سرکاری حکام نے شرکت کی جبکہ اس موقع پر وفاقی دارالحکومت کے تھنک ٹینکس اور تعلیمی اداروں کے سربراہوں نے بھی تقریب میں شرکت کی۔