خفیہ قوتیں آزاد امیدواروں کو فون کر کے دھمکا رہی ہیں، رانا ثناء اللہ

آزاد اورکچھ تحریک انصاف کے ا یم پی ایز سپیکر کے لئے ہمارے امیدوار کو ووٹ دیں گے، موجودہ حالات بڑے طوفان سے پہلے سکون کی مانند ہیں،رہنما مسلم لیگ ن کی نجی ٹی وی کو انٹرویو

بدھ 1 اگست 2018 23:57

خفیہ قوتیں آزاد امیدواروں کو فون کر کے دھمکا رہی ہیں، رانا ثناء اللہ

اسلام آباد(اُردو پوائنٹ اخبارتازہ ترین - آن لائن۔ 01 اگست2018ء) مسلم لیگ ن کے رہنما رانا ثناء اللہ نے الزام عائد کیا ہے کہ خفیہ قوتیں آزاد امیدواروں کو فون کر کے دھمکا رہی ہیں اور تحریک انصاف ان کو لالچ دینے کے ساتھ ساتھ دباؤ بھی ڈال رہی ہے جبکہ11آزاد اور کچھ تحریک انصاف کے ا یم پی ایز سپیکر کے لئے ہمارے امیدوار کو ووٹ دیں گے۔ تفصیلات کے مطابق بدھ کے روز نجی ٹی وی سے گفتگو کرتے ہوئے سابق وزیر قانون پنجاب رانا ثناء اللہ نے دعویٰ کیا ہے کہ 11آزاد ارکان اور تحریک انصاف کے کچھ ایم پی ایز سپیکر کے لئے مسلم لیگ ن کے امیدوار کو ووٹ دے کر سرپرائز دیں گے۔

انہوں نے کہا کہ گزشتہ روز ہونے والی پارٹی اجلاس میں تمام نو منتخب ارکاب موجود تھے اور اختلافات کی خبریں بے بنیاد ہیں۔

(جاری ہے)

رانا ثناء اللہ نے کہا کہ کچھ خفیہ قوتیں آزاد ارکان کو فون کر کے مسلم لی گسے دور رہنے کے لئے دھمکا رہی ہیں جبکہ تحریک انصاف آزاد اراکین کو لالچ دینے کے علاوہ دباؤ بھی ڈال رہی ہے۔ انہوں نے کہا کہ موجودہ حالات بڑے طوفان سے پہلے سکون کی مانند ہیں لیکن یہ زیادہ عرصہ نہیں چلے گا جبکہ پنجاب میں پیپلز پارٹی کی 6نشستیں مخدوم احمد محمود کے اختیار میں ہیں اور انہوں نے شہباز شریف کو اپنی حمایت کا یقین دلایا ہے تاہم بہت سے آزاد ارکان اور تحریک انصاف کے ارکان کے نام حکمت عملی کے طور پر سامنے نہیں لا رہے جبکہ دوسری طرف آزاد امیدواروں کو بھیڑ بکریوں کی طرح لاد لاد کر بنی گالہ لایا جا رہا ہے۔