قائد کے خواب کے مطابق آگے بڑھتے ہوئے خوشحال پاکستان کی تعبیر میں اپنا کردار ادا کرتے رہیں گے‘راجہ حسن اختر

لاہور(اُردو پوائنٹ اخبارتازہ ترین - این این آئی۔ 14 اگست2018ء) جذبہ آزادی سے تقویت پاتے ہوئے ہر دم آگے بڑھنے کے لئے پر عزم ہے،ہم اپنی قومی زندگی کے اہم دن کے موقع پر اس عہد کو دہراتے ہیں کہ اپنی مہارت اور اہلیت کو فروغ دینے کے مشن کو پوری آب وتاب سے جاری رکھیں گے اور قائد کے خواب کے مطابق آگے بڑھتے ہوئے خوشحال پاکستان کی تعبیر میں اپنا کردار ادا کرتے رہیں گے۔

ان خیالات کا اظہارفیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) ریجنل آفس میں پاکستان کے 71ویں جشن آزادی تقریبات کے سلسلے میں منعقدہ خصوصی تقریب سے چیئرمین ایف پی سی سی آئی قائمہ کمیٹی برائے ’’سیاحت‘‘ و چیئرمین پاکستان ٹریڈرز فرنٹ راجہ حسن اختر نے کیا،تقریب میں ایف پی سی سی آئی ریجنل چیئرمین چوہدری عرفان یوسف سمیت تاجروں کی کثیر تعداد نے خصوصی طور پرشرکت کی اور جشن آزادی کا کیک بھی کاٹا گیا۔

(جاری ہے)

چیئرمین ایف پی سی سی آئی ریجنل قائمہ کمیٹی برائے ’’کاٹیج انڈسٹری ‘‘محمدیٰسین نے کہا کہ پاکستان کی معاشی بقا کی جدوجہد میں شریک ہیں، پاکستان ٹریڈرز فرنٹ اورآزاد گروپ نے خلوص،محبت اور بھائی چارے کی فضا کو فروغ دیتے ہوئے تاجر برادری میں اپنا جداگانہ مقام بنایا ہے۔ہم ملکی صنعت و تجارت کے شعبہ کو استحکام دینے کے لیے کوشاں ہیں۔

تاجر برادری کے مسائل کے حل کے لئے کوشاں ہیں۔ راجہ حسن اختر نے مزید کہاکہ ہم نے اقرباء پروری اور خاندانی سیاست کے خلاف آواز اٹھائی ہے۔میرٹ اور اصولوں پر چلتے ہیں۔پاکستان سب سے پہلے ہے ہم پاکستان کی معاشی خوشحالی اور ترقی کے لئے بطور کارکن تاجر برادری کی خدمت کر رہے ہیں۔تاجر برادری کے ہر دکھ درد میں شریک ہونا او ر ان کے مسئلے پر آواز اٹھانا ہمارا فرض ہے۔

پاکستان اللہ تعالیٰ کا انعام ہے اور بے شمار قدرتی و معدنی وسائل سے مالا مال ہے۔جشن آزادی کے اس پر مسرت موقع پر اہل وطن کو آزاد گروپ کی جانب سے مبارکباد پیش کرتا ہوں۔انہوں نے کہاکہ آج 71ویں سال گزرنے کے بعد بھی ہم ایک قوم نہیں بن سکے۔ہمارے پاس نہ کوئی رہبر ہے اور نہ ہی نشان منزل ہے۔محمد یٰسین نے کہاکہ آزادی کی 70سالہ تقریبات پر ہم عہد کرتے ہیں کہ ہم پاکستان کی تجارت اور صنعت کے فروغ کے لیے سر دھڑ کی بازی لگا دیں گے۔