وزارت منصوبہ بندی، ترقی و اصلاحات نے پی ایس ڈی پی کے تحت ایوی ایشن ڈویژن کے ترقیاتی منصوبوں کے لئے 21 کروڑ 4 لاکھ روپے کے فنڈز جاری کر دیئے

جمعرات 16 اگست 2018 12:51

اسلام آباد ۔ (اُردو پوائنٹ اخبارتازہ ترین - اے پی پی۔ 16 اگست2018ء) وزارت منصوبہ بندی، ترقی و اصلاحات نے سرکاری شعبہ کے ترقیاتی پروگراموں میں ایوی ایشن ڈویژن کے ترقیاتی منصوبوں کے لئے مجموعی طورپر 21 کروڑ 4 لاکھ 30ہزار روپے کے فنڈزجاری کردیئے ہیں، حکومت نے اس ڈویژن کے ترقیاتی کاموں کے لئے رواں مالی سال میں 4 ارب 67کروڑ 74 لاکھ روپے کے فنڈز مختص کئے ہیں ۔

(جاری ہے)

پلاننگ کمیشن کی طرف سے جاری کردہ اعداد وشمار کے مطابق حکومت نے بنوں ایئرپورٹ کی اپ گریڈیشن کے لئے 50 لاکھ، ترکی اور پاکستان کے درمیان لنکیج پروگرام کے لئے 63 لاکھ، کراچی میں ریڈار کی تنصیب کے لئے 30 لاکھ، نیواسلام آباد انٹرنیشنل ایئرپورٹ پر سکیورٹی اہلکاروں کی رہائشگاہوں کے لئے 17 کروڑ 19 لاکھ، اسلام آباد میں کسانہ ڈیم کی تعمیر کے لئے 2 کروڑ روپے سمیت مختلف ترقیاتی منصوبوں کے لئے فنڈزجاری کردیئے گئے ہیں۔