جسٹس اطہر من اللہ نے عمران خان کو وزارت عظمی کا حلف اٹھانے سے روکنے کی درخواستوں پر سماعت کرنے سے معذرت کر لی

جمعہ 17 اگست 2018 00:06

اسلام آباد ۔ (اُردو پوائنٹ اخبارتازہ ترین - اے پی پی۔ 16 اگست2018ء) اسلام آباد ہائی کورٹ کے جسٹس اطہر من اللہ نے پاکستان تحریک انصاف کے چیئرمین عمران خان کی بطور رکن قومی اسمبلی نااہلی اور وزارت عظمی کا حلف اٹھانے سے روکنے کی درخواستوں پر سماعت کرنے سے معذرت کر تے ہوئے کہا کہ ان کا افتخار محمد چودھری سے تعلق رہا ہے ، ان کی پارٹی کے رکن کی طرف سے دائر درخواست کی سماعت کرنے والے بنچ کا حصہ نہیں بن سکتا ۔

(جاری ہے)

جمعرات کو اسلام آباد ہائی کورٹ کے جسٹس شوکت عزیز صدیقی اور جسٹس اطہر من اللہ نے عمران خان کی نااہلی کی دو درخواستوں پر سماعت کا آغاز کیا توسابق چیف جسٹس پاکستان افتخار محمد چودھری کی سیاسی جماعت پاکستان جسٹس و ڈیمو کریٹک پارٹی کے رکن عبدالوہاب بلوچ اور ایک شہری حافظ احتشام بطور پٹیشنر زعدالت میں پیش ہوئے تاہم بنچ کے رکن جسٹس اطہر من اللہ نے کیس سننے سے معذرت کرتے ہوئے خود کو بنچ سے الگ کر لیا۔عدالت نے درخواستوں کی سماعت کے لیے نیا بنچ تشکیل دینے کے لیے معاملہ واپس چیف جسٹس اسلام آباد ہائی کورٹ کو بھجوا دیا۔