ملائیشیا نے مالیاتی مسائل سے نمٹنے کے لیے چین سے مدد مانگ لی

پیر 20 اگست 2018 13:00

بیجنگ ۔ (اُردو پوائنٹ اخبارتازہ ترین - اے پی پی۔ 20 اگست2018ء) ملائیشیا کے وزیر اعظم مہاتیر محمد نے ملک کے مالیاتی مسائل سے نمٹنے کے لیے چین سے مدد مانگ لی۔گزشتہ روز بیجنگ کے عظیم ہال میں چینی وزیراعظم لی کی چیانگ کے ساتھ مشترکہ پریس کانفرنس کے دوران مہاتیر محمد نے کہا کہ ان کے ملک کو اس وقت شدید مالی مسائل کا سامنا ہے۔ان کا کہنا تھا کہ وہ سابق وزیراعظم نجیب رزاق جن پر بھاری کرپشن کے الزامات ہیں، کے دور میں چین کے ساتھ طے پانے والے 22 ارب ڈالر کے ترقیاتی و دیگر منصوبوں پر نظر ثانی کا ارادہ رکھتے ہیں جن کے لیے چینی قیادت مدد فراہم کرے۔

انھوں نیملائیشیا سے مصنوعات بالخصوص ذرعی اجناس بشمول فروٹ کی درآمد میں اضافہ کرنے کے لیے رضامندی پر چینی قیادت کا شکریہ ادا کیا۔

(جاری ہے)

انھوں نے توقع ظاہر کی کہ چینی قیادت اس سلسلے میں مزید تعاون کرے گی۔ذرائع ابلاغ کے مطابق ملائیشیا کو اس وقت شدید مالی مسائل کا سامنا ہے جس کی وجہ سابق وزیراعظم نجیب رزاق کی پالیسیاں اور مبینہ طور پر بدعنوانی کی شکایات ہیں۔مہاتیر محمد سابق وزیر اعظم کے دور میں چینی تعاون سے شروع ہونے والی22 ارب ڈالر مالیت کے ترقیاتی و دیگر منصوبوں پر نظر ثانی کا ارادہ رکھتے ہیں جس کے لیے انھوں نے چینی اعلیٰ قیادت سے تعاون کی درخواست کی ہے۔ انھوں نے فوری طور پر ان منصوبوں پر کام روکنے کا حکم دیا ہے ۔