آسٹریلیا کی ہائی کمشنر مارگریٹ ایڈمسن کی پاکستانی قوم کو عید الاضحی کے پر مسرت تہوار پر مبارکباد

منگل 21 اگست 2018 22:50

اسلام آباد ۔ (اُردو پوائنٹ اخبارتازہ ترین - اے پی پی۔ 21 اگست2018ء) پاکستان میں آسٹریلیا کی ہائی کمشنر مارگریٹ ایڈمسن نے پاکستانی قوم کو عید الاضحی کے پر مسرت تہوار کی مبارکباد دی اور کہا کہ دونوں ممالک دیرینہ دوست ہیں اور ان کی یہ دوستی واضح ،دوستانہ اور باہمی احترام کے تعلقات پر مبنی ہے۔منگل کو اپنے تہنیتی پیغام میں انھوں نے کہا کہ میں اس موقع پر پاکستان،آسٹریلیا اور دنیا بھر کے مسلمانوں کو حج اورعیدالاضحی کی مبارکباد پیش کرتی ہوں۔

مارگریٹ ایڈمسن نے آسٹریلیا کے مسلمانوں بشمول پاکستان سے تعلق رکھنے والے پاکستانیوں اورہر سال آسٹریلوی یونیورسٹیوںمیں تعلیم حاصل کرنے والی12ہزار سے زائدطلباء کے آسٹریلیا کو کثیرالثقافت معاشرہ بنانے میں متحرک کردار کا اعتراف کیا۔

(جاری ہے)

آسٹریلوی ہائی کمشنر نے کہا کہ یہ طلبہ وطن واپس آکر ہمارے ایلومنائی نیٹ ورک کا حصہ بنتے ہیں اور پاکستان کے مستقبل اور دونوں ممالک کے مابین تعلقات میں مزید اضافہ میں اہم کردار ادا کرتے ہیں۔

ہائی کمشنر نے کہا کہ آسٹریلیا مضبوط،پائیدار،خوشحال اور جمہوری ملک بنانے کی کوششوں میں پاکستانی عوام کے ساتھ کھڑا ہے۔انھوں نے کہا کہ ہم پاکستان کی ترقیاتی ضروریات میں تعاون کے ذریعے باہمی، پائیداراور صنفی مساوات کی حمایت کے لئے تعاون جاری رکھیں گے۔