آئی ووٹنگ کامقصد انتخابات میں دھاندلی، نتائج میں ردوبدل کرانا ہے ،ْرضا ربانی

جمعرات 6 ستمبر 2018 16:36

اسلام آباد(اُردو پوائنٹ اخبارتازہ ترین - این این آئی۔ 06 ستمبر2018ء) پاکستان پیپلز پارٹی کے سینئر رہنما اور سابق چیئرمین سینیٹ رضا ربانی نے الزام عائد کیا ہے کہ ملک میں انٹرنیٹ پر مشتمل ووٹنگ نظام متعارف کرانے کا مقصد انتخابات میں دھاندلی اور نتائج میں ردوبدل کرانا ہے ،ْابتدائی مرحلے میں ہی انٹرنیٹ ووٹنگ نظام پیچیدگیوں کا شکار رہا اور نادیدہ طاقتیں پاکستان میں انتخابات پر اثر انداز ہو سکتی ہیں۔

ایک انٹرویومیں رضا ربانی نے کہا کہ مذکورہ نظام متعارف کرانے سے قبل پارلیمنٹ میں بحث ہونی چاہیے۔

(جاری ہے)

پیپلز پارٹی کے سینیٹر نے واضح کیا کہ الیکشن کمیشن آف پاکستان (ای سی پی) کی تشکیل کردہ ٹاسک فورسز نے ازخود اس پر تحفظات کا اظہار کیاجس میں بیرون ملک مقیم پاکستانیوں کو انٹرنیٹ کے ذریعے ووٹ ڈالنے کا حق دیا گیا ہے۔انہوںنے کہاکہ ای سی پی اور نادرا رزلٹ ٹرانسمیشن سسٹم (آر ٹی ایس) احسن طریقے سے نہیں چلا سکے اور تحفظات نے جنم لیا ،ْآئی ووٹنگ سائبر کرائم کی نذر بھی ہو سکتا ہے۔رضا ربانی نے واضح کیا کہ آن لائن ووٹ ڈالنے والے کی تصدیق کا کوئی نظام نہیں ہے جبکہ یہ الیکشن ایکٹ کے سیکشن 94 اور آئین کے آرٹیکل 226 کے منافی ہے، جس میں ووٹ کو خفیہ رکھنے کا تقاضہ کیا گیا۔