ملک میں پانی کو محفوظ بنانے اور پاکستان کے مستقبل کو بچانے کے لیے پوری قوم مشترکہ طور پر ڈیمز تعمیر کرے گی

قومی اسمبلی کے ڈپٹی اسپیکر محمد قاسم خان سوری کی نجی ٹی وی چینل سے بات چیت

اتوار 9 ستمبر 2018 22:40

اسلام آباد ۔ (اُردو پوائنٹ اخبارتازہ ترین - اے پی پی۔ 09 ستمبر2018ء) قومی اسمبلی کے ڈپٹی اسپیکر محمد قاسم خان سوری نے کہا ہے کہ ملک میں پانی کو محفوظ بنانے اور پاکستان کے مستقبل کو بچانے کے لیے پوری قوم مشترکہ طور پر ڈیمز تعمیر کرے گی۔ ایک نجی ٹی وی چینل سے بات چیت کرتے ہوئے انہوں نے اپنی ایک ماہ کی تنخواہ ڈیم فنڈ میں دینے کا اعلان کرتے ہوئے عوام سے اپیل کی کہ وہ اس مہم میں بڑھ چڑھ کر حصہ لیں اور ڈیم فنڈ میں جتنا ہو سکے عطیہ دیں۔

(جاری ہے)

انہوں نے کہا کہ پاکستانی قوم اس ڈیم فنڈ میں عطیہ دینے کے لیے تیار ہے اور کوئٹہ کے نوجوانوں نے بھی انہیں ٹیلیفون کیا ہے کہ وہ اس نیک مقصد کے لیے اپنی ایک ماہ کی تنخواہ دینے کو بھی تیار ہیں۔ ڈپٹی اسپیکر قومی اسمبلی کا کہنا تھا کہ نئے ڈیموں کی تعمیر ملک میں بجلی اور پانی کی کمی کو پورا کرنے میں مددگار ثابت ہو گی۔ انہوں نے مزید کہا کہ وزیراعظم عمران خان کی جانب سے سمندر پار پاکستانیوں سے ڈیم فنڈ کے لیے رقم جمع کرنے کا اعلان انتہائی قابل تحسین اقدام ہے۔