وزیراعظم آزاد کشمیر راجہ محمد فاروق حیدر کا کلثوم نواز کے انتقال پراظہارافسوس

منگل 11 ستمبر 2018 20:01

وزیراعظم آزاد کشمیر راجہ محمد فاروق حیدر کا کلثوم نواز کے انتقال پراظہارافسوس
اسلام آباد(اُردو پوائنٹ اخبارتازہ ترین - این این آئی۔ 11 ستمبر2018ء) آزادجموں وکشمیر کے وزیراعظم راجہ محمد فاروق حیدر خان نے سابق خاتون اول محترمہ کلثوم نواز کے انتقال پر گہرے رنج و غم کا اظہار کیا ہے۔وزیراعظم آزادکشمیر نے سابق وزیراعظم پاکستان ،مسلم لیگ ن کے قائد محمد نواز شریف کے نام تعزیتی پیغام میں محترمہ کلثوم نواز کی پاکستان،جمہوریت اور عوام کے لیے خدمات کو شاندار الفاظ میں خراج عقیدت پیش کیا۔

(جاری ہے)

راجہ محمد فاروق حیدر خان نے کہا کہ محترمہ کلثوم نواز نے آمریت کے خلاف جس دلیرانہ انداز میں تحریک کی قیادت کی وہ پاکستان کی سیاسی تاریخ کا ایک روشن استعارہ ہے۔انہوں نے جمہوریت کیلیے مرحومہ کی خدمات کا ذکر کرتے ہوے کہا کہ وہ ہر مشکل وقت میں عوام کے حق حکمرانی کے لیے میدان میں رہیں جن کا خلا ء مدتوں پر نہیں کیا جا سکے گا۔انہوں نے دعا کی کہ اللہ تعالی ان کے درجات سربلند فرمائے اور خاندان کو یہ صدمہ برداشت کرنے کا حوصلہ عطا فرمائے۔