صرف گورنر ہائو سز کھولنے اور گاڑیاں نیلام کرکے ملک نہیں چلے گا ، احسن اقبال

ترقیاتی بجٹ پر کلہاڑا مارنے کی خبر زیرِ گردش ہے، حکومت چلانا اناڑیوں کا کام نہیں، سابق وزیرداخلہ کی میڈیا سے گفتگو

پیر 17 ستمبر 2018 15:11

صرف گورنر ہائو سز کھولنے اور گاڑیاں نیلام کرکے ملک نہیں چلے گا ، احسن ..

اسلام آباد(اُردو پوائنٹ اخبارتازہ ترین - آن لائن۔ 17 ستمبر2018ء) سابق وزیر داخلہ اور مسلم لیگ(ن) کے رہنما احسن اقبال نے کہا ہے کہ صرف گورنر ہائو سز کھولنے اور گاڑیاں نیلام کرکے ملک نہیں چلے گا ، اورنہ ہی ڈیم چندے کے پیسوں سے تعمیر ہوتے ہیں، دیامیر بھاشا ڈیم کے لیے ہماری حکومت نے 122 ارب روپے جاری کیے اور ڈیم کے لئے زمین بھی حاصل کرلی گئی ہے۔

اسلام آباد ہائی کورٹ کے باہر میڈیا سے بات کرتے ہوئے سابق وفاقی وزیراحسن اقبال کا کہنا تھا کہ ترقیاتی بجٹ پر کلہاڑا مارنے کی خبر زیرِ گردش ہے، موجودہ وقت میں عملا گزشتہ 6 ماہ سے پاکستان کا ڈویلپمنٹ پورٹ فولیو جامد ہوچکا ہے، جس ملک میں 6 ماہ تک ترقی کا عمل رکا ہوا ہو وہ ملک کس طرح ترقی کرسکتا ہے۔

(جاری ہے)

احسن اقبال کا کہنا تھا کہ حکومت کی جانب سے ملک کو فائدہ پہنچانے والے منصوبے سی پیک کے حوالے سے بھی ٹھوس لائحہ عمل سامنے نہیں آیا، حکومت چلانا اناڑیوں کا کام نہیں، گورنر ہاسز کھولنے اور گاڑیاں نیلام کرکے ملک نہیں چلتے، اورنہ ہی ڈیم چندے کے پیسوں سے تعمیر ہوتے ہیں، دیامیر بھاشا ڈیم کے لیے ہماری حکومت نے 122 ارب روپے جاری کیے اور ڈیم کے لئے زمین بھی حاصل کرلی گئی ہے ، انہو ں نے مزید کہا کہ چیف جسٹس کے ڈیم فنڈ کے لیے کو ششوں پر شکر گزار ہیں ،حکومت سبسڈی کو ختم کرکے عوام کی مشکلات میں اضافہ کررہی ہے، ہم نے عوام کے لئے جو رعایتیں حکومت کو دی ہیں ان کا بھرپور دفاع کریں گے اور حکومت کے ان اقدامات کی مخالفت بھی کریں گے، ہم نے حکومت کو پہلے 100 دن کھلی چھٹی دی ہے تاکہ بعد میں یہ نہ کہا جائے کہ کام نہیں کرنے دیا گیا۔