چیئرمین سینیٹ محمد صادق سنجرانی کی قیادت میں سینیٹ کا 4 رکنی پارلیمانی وفد(کل) آذربائیجان روانہ ہوگا

منگل 18 ستمبر 2018 20:31

اسلام آباد ۔ (اُردو پوائنٹ اخبارتازہ ترین - اے پی پی۔ 18 ستمبر2018ء) چیئرمین سینیٹ محمد صادق سنجرانی کی قیادت میں سینیٹ کا 4 رکنی پارلیمانی وفد(کل) بدھ کوآذربائیجان کے دورے پر روانہ ہوگا۔ ایوان بالاء کے وفد کو آذربائیجان کی پارلیمنٹ کے چیئرمین نے ان کی صد سالہ تقریبات میں شرکت کی دعوت دی ہے۔

(جاری ہے)

وفد اپنے دورے کے دوران آذربائیجان کی صد سالہ تقریبات میں شرکت کرنے کے علا وہ آذربائیجان کے صدر اور وزیراعظم سے بھی ملاقاتیں کرے گا، جبکہ دیگر اعلیٰ حکومتی عہدیداروں اور پارلیمانی قیادت سے ملاقاتیں بھی دورے میں شامل ہیں۔

چیئرمین سینیٹ نے کہا کہ پاکستان اور آذربائیجان کے آپس میں دوستانہ تعلقات ہیں اور پارلیمانی وفود کے تبادلوں سے باہمی روابط کو مزید فروغ ملے گا۔ وفد میں سینیٹ میں قائد ایوان سینیٹر سید شبلی فرازکے علاوہ سینیٹرز سردار محمد اعظم خان موسیٰ خیل اور نگہت مرزا شامل ہیں۔