یورپین کنزرویٹو اینڈ ریفارمسٹس گروپ کے چھ رکنی وفد کا لاہور چیمبر کا دورہ

بدھ 19 ستمبر 2018 20:16

یورپین کنزرویٹو اینڈ ریفارمسٹس گروپ کے چھ رکنی وفد کا لاہور چیمبر کا ..
لاہور۔19 ستمبر(اُردو پوائنٹ اخبارتازہ ترین - اے پی پی۔ 19 ستمبر2018ء) یورپین کنزرویٹو اینڈ ریفارمسٹس گروپ کے چھ رکنی وفد نے لاہور چیمبر کا دورہ کیا اور لاہور چیمبر کے صدر ملک طاہر جاوید، سینئر نائب صدر خواجہ خاور رشید، نائب صدر ذیشان خلیل اور ایگزیکٹو کمیٹی سے تفصیلی ملاقات کی، اس موقع پر جی ایس پی پلس سٹیٹس اور تجارتی و معاشی صورتحال سمیت دیگر کئی امور پر تبادلہ خیال ہوا، وفد کے سربراہ ہسنس اولف ہینکل نے کہا کہ دورے کا مقصد پاکستان میں معاشی و سیاسی صورتحال کا جائزہ لینا تھا، انہوں نے کہا کہ ٹیکسٹائل پاکستان کا بڑا برآمدی شعبہ ہے ، پاکستان کو دیگر شعبوں کی پوٹینشل سے بھی بھرپور فائدہ اٹھانا چاہئے تاکہ یہ اپنی برآمدات بڑھاسکے، انہوں نے کہا کہ پاکستان میں صورتحال مسلسل بہتر ہورہی ہے، سکیورٹی کی صورتحال بہت اچھی ہے اور وفد کے اراکین خود کو ہر حوالے سے محفوظ تصور کررہے ہیں، لاہور چیمبر کے صدر ملک طاہر جاوید نے کہا کہ پاکستان کو 2013ء میں جی ایس پی پلس سٹیٹس دیا گیا تھا جو جنوری 2014ء میں نافذ العمل ہوا، توقع کے برعکس اس سے اتنا فائدہ نہیں ہوسکا جتنا ہونا چاہئے تھا، اب امید ہے کہ اگلے چند سالوں میں جی ایس پی پلس سٹیٹس کے تحت پاکستان کی یورپین یونین کو برآمدات میں اضافہ ہوگا، انہوں نے کہا کہ دوسری مرتبہ پاکستان کو جی ایس پی پلس سٹیٹس ملنا اس بات کا ثبوت ہے کہ یورپین پارلیمنٹ پاکستان میں ترقی کی رفتار اور جی ایس پی پلس سٹیٹس کے تحت 27کنونشنز پر عمل درآمد کے حوالے سے مطمئن ہیں، لاہور چیمبر آف کامرس اینڈ انڈسٹری کے صدر نے حکومت سے اپیل کی کہ وہ ترقیاتی رفتار کو مزید تیز کرنے کیلئے ٹھوس اقدامات اٹھائے اور برآمدی شعبے کیلئے آسانیاں پیدا کرے تاکہ وہ جی ایس پی پلس سٹیٹس سے بھرپور فائدہ اٹھاسکے۔