جمرود میں انتظامیہ کی آئس سمگلروں کے خلاف کارروائیاں ‘ 25 انتہائی مطلوب سمگلر گرفتار

ہفتہ 22 ستمبر 2018 22:18

لنڈی کوتل۔22 ستمبر(اُردو پوائنٹ اخبارتازہ ترین - اے پی پی۔ 22 ستمبر2018ء) ضلع خیبرکی تحصیل جمرود میں انتظامیہ نے آئس سمگلروں کے خلاف کارروائیوں کے دوران 25 انتہائی مطلوب اسمگلروں کو گرفتار کرلیا ہے۔

(جاری ہے)

تفصیلات کے مطابق نئے تعینات اسسٹنٹ کمشنرجمرود سلیم جان مروت و لائن آفیسر ذوالفقار خان نے خاصہ دارفورس کی بھاری نفری کے ہمراہ خفیہ اطلاع پر جمرود کے مختلف علاقوں میں کارروائیاں کی جس کے دوران 15آئس منشیات فروش اور 10اسمگلروں کو حراست میں لے کر مزید تفتیش کیلئے جمرود حوالات منتقل کردیئے گئے‘ ان گرفتار افراد سے آئس ودیگر منشیات بھی برآمد کرکے قبضہ میں لی گئی ہے۔

اسسٹنٹ کمشنر جمرودسلیم جان مروت نے میڈیاکو بتایا کہ آخری مجرم کی گرفتاری تک اور آئس سمیت ہرقسم منشیات کا قلع قمع کرنے کیلئے کارروائیوں کا سلسلہ جاری رکھا جائے گا۔علاقائی مشران نے آئس ودیگر منشیات اسمگلروں اور مقامی سطح پر منشیات کا کاروبار کرنے والوں کے خلاف ایسی انتظامیہ کی کارروائی کو سراہتے ہوئے بھرپور تعاون کا اعلان کیا ہے۔