رافیل جیٹ طیارہ معاہدہ بھارتی وزیراعظم مودی کے لئے ’’پاناما‘‘ بن گیا،مودی بھارتی عوام کی توجہ اس ڈیل سے ہٹانا اوربیرونی معاملات کی طرف موڑنا چاہتے ہیں،بلا جھجک کہوں گا کہ مودی کو عوام سے زیادہ سیاست عزیز ہے

وفاقی وزیر اطلاعات و نشریات چوہدری فواد حسین کا انڈیا ٹوڈے کو انٹرویو

منگل ستمبر 01:00

اسلام آباد ۔ (اُردو پوائنٹ اخبارتازہ ترین۔ 25 ستمبر2018ء) وفاقی وزیر اطلاعات و نشریات چوہدری فواد حسین نے کہا ہے کہ رافیل جیٹ طیارہ معاہدہ بھارتی وزیراعظم مودی کے لئے ’’پاناما‘‘ بن گیا۔

(جاری ہے)

انڈیا ٹوڈے کو دیئے گئے ایک انٹرویو میں سابق وزیراعظم محمد نواز شریف کی کرپشن کے خلاف تحقیقات کا حوالہ دیتے ہوئے وفاقی وزیر اطلاعات نے کہا کہ ہم سوچتے ہیں کہ ’’رافیل‘‘ بھارتی وزیراعظم مودی کے لئے ’’پاناما‘‘بن گیا ہے جس طرح مودی کے دوست نواز شریف کو پاناما کیس میں باہر نکالا گیا، میرا خیال ہے یہی کچھ بھارت میں ہونے جا رہا ہے۔

فواد چوہدری نے کہا کہ مودی رافیل ڈیل میں سخت مشکل سے دوچار ہیں اور وہ بھارتی عوام کی توجہ اس ڈیل سے ہٹانا اوربیرونی معاملات کی طرف موڑنا چاہتے ہیں۔ انہوں نے کہا کہ اپنی جنگ خود لڑو، اگر بی جے پی اور وزیراعظم مودی اپنی جنگ بھارت کے اندر لڑتے ہیں تو ہمیں کوئی مسئلہ نہیں لیکن مسئلہ یہ ہے کہ وہ پاکستان کا نام لے کر عوام کی توجہ اس ڈیل سے ہٹانا چاہتے ہیں جو ایک مذاق ہے۔ انہوں نے کہا کہ میں بلا جھجک کہوں گا کہ مودی کو عوام سے زیادہ سیاست عزیز ہے۔