ٹریفک جام: وزیراعلیٰ کی ٹریفک مینجمنٹ بہتربنانے کی ہدایت

لاہور(اُردوپوائنٹ اخبارتازہ ترین۔25 ستمبر 2018ء) وزیراعلیٰ عثمان بزدارنے ٹریفک پولیس کو شہر کے مختلف علاقوں میں ٹریفک کی روانی فوری طور پر بہتر بنانے کی ہدایت کی ہے۔ وزیراعلیٰ نے کہا کہ ٹریفک حکام خود موقع پرجا کر ٹریفک رواں دواں رکھنے کیلئے مربوط انداز میں اقدامات کریں اور بعض علاقوں میں ٹریفک جام ہونے سے عوام کی دقت کے ازالے کیلئے ٹریفک مینجمنٹ پر خصوصی توجہ دی جائے۔

انہوں نے کہا کہ ٹریفک کی صورتحال کو بہتر بنا کر رپورٹ وزیراعلیٰ آفس پیش کی جائے۔ انہوں نے کہا کہ شہریوں کو پیش آنے والی مشکلات کو دور کرنا ٹریفک حکام کا فرض ہے۔دریں اثناں وزیر اعلی پنجاب سردار عثمان بزدار نے کہا ہے کہ بلدیاتی اداروں کو حقیقی معنوں میں مضبوط اور فعال بنایا جائے گا اور اختیارات نچلی سطح پر منتقل کیے جائیں گے تاکہ عوام کے مسائل ان کی دہلیز پر حل ہوں اورانہیں ریلیف مل سکے کیونکہ تحریک انصاف کا ایجنڈا عوام کو سہولتیں فراہم کرنا اوران کے مسائل ترجیحی بنیادوں پر حل کرنا ہے ۔

(جاری ہے)

انہوں نے کہاکہ تحریک انصاف مشاورت کے ساتھ نیا بلدیاتی نظام لا رہی ہے اوراس نئے بلدیاتی نظا م کے تحت عوام کو ریلیف ملے گاکیونکہ نئے پاکستان میں فرسودہ بلدیاتی نظام کی کوئی گنجائش نہیں ،موجودہ نظام عوام کے مسائل نچلی سطح پر حل کرنے میں ناکام رہا ہے اور بلدیاتی اداروں کوبے اختیار رکھا گیاہے۔انہوں نے کہا کہ ہماری حکومت بلدیاتی نمائندوں کو اختیار بھی دے گی اورچیک اینڈ بیلنس بھی رکھے گی۔

عوام کے نمائندے عوام کو جوابدہ ہونگے-نئے بلدیاتی نظام کا محور عوام ہیں،جن کے مسائل ان کے دروازے پر حل ہوں گے۔انہوں نے کہا کہ نیا بلدیاتی نظام موجودہ فرسودہ سٹیٹس کو ختم کرے گا۔نئے بلدیاتی نظام سے پسماندہ علاقوں کے مسائل کے حل میں نمایاں مدد ملے گی۔انہوں نے کہا کہ نئے پاکستان کی تعمیر کیلئے بلدیاتی اداروں کو درست سمت فعال بنایا جارہاہے ۔

نیا بلدیاتی نظام عوام کی امنگوں اورخواہشات کے عین مطابق ہوگا۔انہوں نے کہا کہ وزیراعظم عمران خان کے ایجنڈے پر عمل کرتے ہوئے بلدیاتی اداروں میں چیک اینڈ بیلنس رکھا جائے گا۔نئے نظام میں شفافیت کوہر قیمت پر ملحوظ خاطر رکھاجائے گا۔انہوں نے کہا کہ ایسا نظام وضع کیا جارہا ہے جس سے عوام کے مسائل نچلی سطح پر حل ہوں گے۔بلدیاتی نظام عوام کا نظام ہوگا اوروہی اس میں بااختیار ہوں گے۔انہوں نے کہا کہ نئے بلدیاتی نظام میں جزا اور سزا کا نظام بھی ہوگا۔