صدر مملکت ڈاکٹر عارف علوی سے وفاقی وزیر برائے اطلاعات و نشریات چوہدری فواد حسین کی ملاقات

جمعرات 27 ستمبر 2018 20:28

اسلام آباد ۔ (اُردو پوائنٹ اخبارتازہ ترین - اے پی پی۔ 27 ستمبر2018ء) صدر مملکت ڈاکٹر عارف علوی سے وفاقی وزیر برائے اطلاعات و نشریات چوہدری فواد حسین نے وزیراعظم کے معاون خصوصی افتخار درانی کے ہمراہ جمعرات کو ایوان صدر میں ملاقات کی۔ اس موقع پر صدر مملکت نے کہا کہ عوام کو بنیادی سہولیات کی فراہمی حکومت کی اولین ذمہ داری ہے۔

(جاری ہے)

انہوں نے کہا کہ وہ اس ضمن میں فعال کردار ادا کریں گے اور آئینی تقاضوں کے مطابق اپنی ذمہ داریاں سرانجام دیں گے۔ صدر مملکت نے وزیراعظم کے ماحولیات کی ترقی کیلئے اقدامات کو سراہا اور اس کارخیر میں اپنی مکمل حمایت کا یقین دلایا۔ صدر مملکت نے غیر ضروری پروٹوکول کو کم سے کم رکھنے پر زور دیتے ہوئے خود اس کا عملی مظاہرہ کرنے کے عزم کا اظہار کیا۔