بھارت میں دہشت گردی پاکستان سے آتی ہے ،ْبھارتی وزیر خارجہ سشما سوراج کی ہرزہ سرائی

پاکستان سے مذاکرات کے لیے فرار کا الزام بھارت پر عائد کرنا درست نہیں، بھارت کے خلاف پراپیگنڈا کرنا پاکستان کی عادت ہے ،ْ اجلاس سے خطاب

ہفتہ 29 ستمبر 2018 23:04

بھارت میں دہشت گردی پاکستان سے آتی ہے ،ْبھارتی وزیر خارجہ سشما سوراج ..

نیویارک(اُردو پوائنٹ اخبارتازہ ترین - این این آئی۔ 29 ستمبر2018ء) بھارتی وزیر خارجہ نے پاکستان کے خلاف شدید ہرزہ سرائی کرتے ہوئے کہا ہے کہ بھارت میں دہشت گردی پاکستان سے آتی ہے اور اسامہ بن لادن کا پاکستان میں پایا جانا اس کا ثبوت ہے۔

(جاری ہے)

نیویارک میں اقوام متحدہ کے 73 ویں جنرل اسمبلی اجلاس سے خطاب کرتے ہوئے بھارتی وزیر خارجہ نے پاکستان پر الزامات کی بوچھاڑ کرتے ہوئے کہا کہ دہشت گردی کا ناسور دنیا بھر میں پھیل چکا ہے لیکن بھارت میں دہشت گردی پاکستان کی طرف سے آتی ہے، القاعدہ کے سربراہ اسامہ بن لادن کا پاکستان میں پایا جانا اس بات کا واضح ثبوت ہے جب کہ ممبئی حملوں کا ماسٹر مائنڈ اب بھی آزاد ہے۔

بھارتی وزیر خارجہ نے کہا کہ پاکستان سے مذاکرات کے لیے فرار کا الزام بھارت پر عائد کرنا درست نہیں، بھارت کے خلاف پراپیگنڈا کرنا پاکستان کی عادت ہے، مذاکرات کا عمل پاکستان ہی کے باعث ممکن نہ ہوا ہم نے پاکستان میں نومنتخب حکومت کی مذاکرات کی دعوت قبول کی لیکن کشمیر کے حالات کے باعث مذاکرات ملتوی کیے۔سشما سوراج نے الزام عائد کیا کہ پاکستانی حکومت دہشت گردوں کی یاد میں ڈاک ٹکٹ جاری کرتی ہے، اقوام متحدہ کا اثرو رسوخ کم ہوتا جا رہا ہے اس لیے اقوام متحدہ میں تبدیلیاں کی جانی چاہئیں۔