ایکسپورٹ سیکٹر کو مراعات کے نتیجے میں 100ٹیکسٹائل ملز دوبارہ چلنے کے امکانات

کراچی۔ (اُردو پوائنٹ اخبارتازہ ترین - اے پی پی۔ 15 اکتوبر2018ء) پاکستان بزنس مین اینڈ انٹلیکچولز فورم کے صدر میاں زاہد حسین نے کہا ہے کہ پنجاب میں گیس کی قیمتیں باقی صوبوں کے مطابق کرنے سے ٹیکسٹائل کی 100 بند صنعتیںکھلنے کا اعلان ہوا جس سے ٹیکسٹائل سیکٹر کا برآمدات میں حصہ بڑھے گا لیکن تمام شعبوں میں یکساں ترقی کے لئے حکومت صنعتی اور برآمداتی سیکٹرز کے لئے مراعات فراہم کرے۔

پیر کو جاری کردہ اعلامیہ میں انہوں نے کہا کہ پی ٹی اے کی جانب سے غیر رجسٹرد موبائل فونز کے استعمال کے خلاف حالیہ کریک ڈاون سے موبائل فون کی غیر قانونی تجارت کا راستہ روکنے میں مدد ملے گی اور ایک بڑی صنعت ٹیکس نیٹ میں شامل ہوگی۔ حکومتی اعلانات کے مطابق 20 اکتوبر کے بعد تمام موبائل جو غیر قانونی ذریعے سے ملک میں آئے ہیں، بند ہو جائیں گے۔

(جاری ہے)

اسمگلنگ کی راہ روکنے کے لئے وزیر خزانہ اسد عمر کے مطابق ٹیکنالوجی کا استعمال بڑھایا جائے گا جس سے مستقبل میں اسمگلنگ کا سدباب کیا جا سکے گا۔ اعداد و شمار کے مطابق پاکستان میں تقریباً 15 کروڑ افراد موبائیل فونز استعمال کرتے ہیں جن میں سے 77 فیصد افراد اسمارٹ فون استعمال کرتے ہیں، موبائیل فونز کی صنعت کے ٹیکس نیٹ میں شامل ہونے سے ٹیکسز کی مد میں حکومتی آمدن میں زبردست اضافہ ہو گا اور موبائیل فونز کے غیر قانونی سرگرمیوں اور دہشت گردی کے لئے استعمال کو روکنے میں مدد ملے گی۔