وزیراعظم ہاؤس میں نیلامی کیلئے پیش 49 میں سے صرف ایک ہی گاڑی فروخت

اکتوبر کو دوبارہ نیلامی کی جائے گی ،ْ آئندہ گاڑیوں کی نیلامی وزیراعظم ہاؤس کے بجائے آئی نائن ڈرائی پورٹ پر کی جائیگی ،ْ کسٹم حکام

بدھ 17 اکتوبر 2018 16:31

وزیراعظم ہاؤس میں نیلامی کیلئے پیش 49 میں سے صرف ایک ہی گاڑی فروخت

اسلام آباد(اُردو پوائنٹ اخبارتازہ ترین - این این آئی۔ 17 اکتوبر2018ء) وزیراعظم عمران خان کی کفایت شعاری مہم کے تحت گاڑیوں کی نیلامی کا دوسرا مرحلہ بدھ کو ہوا تاہم نیلامی کے دوران 49 گاڑیوں میں سے صرف ایک ہی گاڑی فروخت کی جاسکی۔وزیراعظم ہاؤس کے زیراستعمال گاڑیوں کی نیلامی کے دوسرے مرحلے میں 49 گاڑیوں کو نیلامی کیلئے پیش کیا گیا جن میں بم پروف اور بلٹ پروف گاڑیاں بھی شامل تھیں۔

(جاری ہے)

نیلامی کا آغاز دن 12 بجے شروع ہوا جس کے دوران صرف ایک گاڑی 90 لاکھ روپے میں نیلام ہوسکی اور دوپہر 2 بجے نیلامی کا عمل مکمل کیا گیا۔کسٹم حکام کے مطابق 25 اکتوبر کو دوبارہ نیلامی کی جائے گی اور آئندہ گاڑیوں کی نیلامی وزیراعظم ہاؤس کے بجائے آئی نائن ڈرائی پورٹ پر کی جائے گی۔کسٹم حکام کے مطابق وزیراعظم ہاؤس تک لوگوں کی رسائی آسانی سے ممکن نہیں اور لوگوں کو سمجھنا چاہیے کہ ان گاڑیوں میں خصوصیات ہیں، اس لیے قیمت زیادہ ہے۔یاد رہے کہ گاڑیوں کی نیلامی کے پہلے مرحلے میں 102 گاڑیاں رکھی گئیں تھیں جس میں سے 62 گاڑیاں فروخت ہوئی تھیں۔