سانحہ 12 مئی سے جڑے 65 مقدمات کی الگ الگ جے آئی ٹی بنانے کا فیصلہ

جمعرات 18 اکتوبر 2018 14:19

کراچی (اُردو پوائنٹ اخبارتازہ ترین - این این آئی۔ 18 اکتوبر2018ء) کراچی میں سانحہ 12 مئی کی تحقیقاتی کیلئے اعلیٰ عدلیہ کے حکم پر سندھ حکومت کی جانب سے بنائی گئی جوائنٹ انوسٹی گیشن ٹیم (جے آئی ٹی) نے سانحہ سے متعلق 65 مقدمات کی تفتیش کیلئے الگ الگ جے آئی ٹی بنانے کا فیصلہ کیا ہے اس سلسلے میں آئندہ دنوں جے آئی ٹی کے مزید اجلاس منعقد ہونگے۔ پولیس ذرائع کے مطابق جے آئی ٹی کا پہلا باضابطہ اور غیرمعمولی اجلاس کراچی پولیس آفس (کے پی او) میں جے آئی ٹی سربراہ ڈاکٹر امیر احمد شیخ کی سربراہی میں منعقد ہوا جس میں پاکستان رینجرز، آئی ایس آئی، ملٹری انٹیلی جنس، اسپیشل برانچ، سی ٹی ڈی، سی آئی اے کے نمائندے شریک ہوئے۔

جے آئی ٹی میں کراچی کے تینوں زونز کے ڈی آئی جیز، تمام متعلقہ ایس ایس پیز انویسٹی گیشن اور سانحہ 12 مئی سے متعلق مقدمات کے تفتیشی افسران شریک تھے۔

(جاری ہے)

ذرائع کے مطابق سانحہ 12 مئی کی ابتدائی تحقیقات میں مختلف خامیوں اور کمزوریوں پر بھی بات چیت کی گئی۔ ذرائع کے مطابق اس سلسلے میں جے آئی ٹی نے متفقہ طور پر تمام 65 مقدمات کی از سر نو تفتیش اور تحقیقات کی ضرورت پر زور دیا۔جے آئی ٹی کے سربراہ ایڈیشنل آئی جی کراچی ڈاکٹر امیر احمد شیخ کے مطابق جی ای ڈی کے اس غیر معمولی اجلاس میں تمام لوگ اس امر پر متفق ہیں کہ سانحہ 12 مئی سے جوڑے 65 مقدمات کی نئے سرے سے تفتیش اور تحقیقات کیلئے الگ الگ جے آئی ٹیز بنائی جائیں۔