الیکشن کمیشن نے سندھ اسمبلی کے رکن تیمور تالپور کی جانب سے سینیٹ انتخابات میں ہارس ٹریڈنگ کے الزامات کے کیس پر فیصلہ محفوظ کر لیا

جمعرات 18 اکتوبر 2018 16:15

اسلام آباد ۔ (اُردو پوائنٹ اخبارتازہ ترین - اے پی پی۔ 18 اکتوبر2018ء) الیکشن کمیشن نے سندھ اسمبلی کے رکن تیمور تالپور کی جانب سے سینیٹ انتخابات میں ہارس ٹریڈنگ کے الزامات کے کیس پر فیصلہ محفوظ کر لیا۔ الیکشن کمیشن میں جمعرات کو اس کیس کی سماعت ہوئی جس میں درخواست گزار زیاد کیانی کے وکیل پیش ہوئے جبکہ تیمور تالپور کے وکیل بھی کمیشن کے سامنے پیش ہوئے۔

(جاری ہے)

اس موقع پر زیاد کیانی کے وکیل نے کہا کہ تیمور تالپور نے اسمبلی کے فلور پر جو بیان دیا ہے وہ اب اس سے ہٹ رہے ہیں، اس کا مطلب ہے کہ وہ غلط بیانی کر رہے ہیں، کوئی رکن پارلیمان میں کوئی بات کرتا ہے تو اسے درست بات سمجھا جاتا ہے۔ اس پر چیف الیکشن کمشنر نے کہا کہ انہوں نے کیا غلط بیانی کی ہی تیمور تالپور کے وکیل نے کہا کہ ان کے مؤکل کے خلاف درخواست گزار کا تعلق پاکستان تحریک انصاف سے ہے اور وہ اس جماعت کا عہدیدار ہے۔ کمیشن نے اس کیس پر فیصلہ محفوظ کر لیا۔