محمد عباس نے وہ اعزاز حاصل کرلیا جو عمر گل ،محمد عامر یا جنید خان کے پاس بھی نہیں

ابوظہبی(اردو پوائنٹ تازہ ترین اخبار۔ 19 اکتوبر2018ء) ابوظہبی ٹیسٹ کی دوسری اننگز میں محمد عباس نے آسٹریلیاکیخلاف پھر 5وکٹیں حاصل کر لیں،اس طرح محمد عباس 12سال بعد 10وکٹیں لینے والے پہلے پاکستانی باﺅلربن گئے۔تفصیلات کے مطابق ابوظہبی ٹیسٹ کی دوسری اننگز میں آسٹریلیا کی پاکستان کیخلاف بیٹنگ جاری ہے تاہم پاکستانی باﺅلرز کے سامنے کینگروز کی کچھ نہ چل سکی اور وہ محمد عباس کی تباہ کن باﺅلنگ کے سامنے ریت کی دیوار ثابت ہو ئی،محمد عباس نے دوسری اننگز میں بھی آسٹریلیاکیخلاف پھر5 وکٹیں حاصل کرلیں،ابوظہبی ٹیسٹ میں محمد عباس نے کل 10وکٹیں حاصل کرلیں،اس طرح محمد عباس 12سال بعد 10وکٹیں لینے والے پہلے پاکستانی باﺅلربن گئے،اس سے پہلے 2006ءمیں محمد آصف نے سری لنکا کےخلاف کینڈی ٹیسٹ میں 11شکار کئے تھے۔

(جاری ہے)

یاد رہے کہ پاکستان نے ابوظہبی ٹیسٹ میں آسٹریلیا کو 373رنز سے شکست د ے کر 2ٹیسٹ میچز کی سیریز 1-0سے اپنے نام کرلی ہے ۔ابوظہبی ٹیسٹ میں چوتھے روز آسٹریلیا نے ایک وکٹ کے نقصان پر 47 رنز سے اپنی نامکمل اننگز کا آغاز کیا لیکن محمد عباس نے ایک بار پھر شاندار باﺅلنگ کا مظاہرہ کرتے ہوئے ٹرویس ہیڈ کو36 رنز پر کیچ آﺅٹ کروایا اور پھر مچل مارش 5رنز پر ایل بی ڈبلیو آﺅٹ کرکے پویلین واپس بھیجا، اس کے بعد انہوں نے کینگرواوپنر ایرون فنچ کو31رنز پر ایل بی ڈبلیو آﺅٹ کیا اور پھر آسٹریلیوی کپتان ٹم پین بغیر کوئی رن بنائے وکٹوں میں آنے والی گیند کو چھوڑنے کے نتیجے میں بولڈ ہوکر پوویلین لوٹ گئے۔

مچل سٹار ک کو یاسر شاہ نے ایل بی ڈبلیو آﺅٹ کیا جبکہ لبسجینی محمد عبا س کا شکار بنے جنہوں نے میچ میں اپنے 10شکار مکمل کیے ، یاسر شاہ نے جان ہالینڈ کو آﺅٹ کرکے اپنی تیسری وکٹ حاصل کی اور آسٹریلیا کی پور ی ٹیم صرف 164رنز بنا کر پوویین لوٹ گئی ، پاکستان کی جانب سے شاندار بولنگ کا مظاہرہ کرتے ہوئے محمد عباس نے 5شکار کیے،یاسر شاہ نے 3 جب کہ میر حمزہ نے ایک وکٹ حاصل کی۔

اس سے قبل ابوظہبی میں کھیلے جانےوالے میچ کے تیسرے دن پاکستان نے دوبارہ بیٹنگ کا آغاز کیا تو حارث سہیل گزشتہ روز کے سکور میں 10 رنز کے اضافے کے بعد آﺅٹ ہوئے تاہم 6 رنز بعد ہی سابق کپتان اظہر علی مضحکہ خیز طریقے سے اپنی وکٹ گنوا بیٹھے، جس کے بعد اسد شفیق اور بابر اعظم نے ٹیم کو سنبھالا لیکن اسد شفیق بھی 235 رنز کے مجموعے پر 44 رنز بنا کر لبوشین کی گیند پر آﺅٹ ہوگئے۔

5وکٹیں گنوانے کے بعد کپتان سرفراز احمد اور نوجوان بابر اعظم نے ذمہ دارانہ کھیل پیش کرتے ہوئے پاکستان کی برتری کو 500 رنز تک پہنچا دیا۔دریں اثنا بابر اعظم اپنی پہلی ٹیسٹ سنچری مکمل نہ کر سکے اور مچل مارش کی گیند پر 99 رنز بنانے کے بعد ایل بی ڈبلیو آﺅٹ ہوگئے۔واضح رہے کہ بابر اعظم اب تک 13 ٹیسٹ میچ کھیلے چکے ہیں جس میں انہوں نے 6 نصف سنچریاں سکور کیں تاہم سنچری بنانے میں ناکام رہے ہیں۔

پاکستانی ٹیم اپنی پہلی اننگز میں 282 ر نز بنانے کے بعد آﺅٹ ہوگئی تھی، جس میں فخر زمان اور سرفراز احمد نے 94، 94 رنز سکور کیے تھے۔پاکستان کے محمد عباس نے شاندار باﺅلنگ کا مظاہرہ کرتے ہوئے کھیل کے دوسرے دن 33 رنز دے کر 5 آسٹریلین کھلاڑیوں کو آﺅٹ کرکے ان کی اننگز 145 رنز پر تمام کردی تھی۔پاکستان نے اپنی دوسری اننگز کا آغاز کیا تو محمد حفیظ میچ میں دوسری مرتبہ پھر ناکام ہوگئے اور 6 رنز بنانے کے بعد 15 کے مجموعے پر اپنی وکٹ دے بیٹھے۔

حفیظ کے بعد اظہر علی اور فخرزمان نے آسٹریلین کھلاڑیوں کے چیلنج کو قبول کیا اور ٹیم کا سکور 106 رنز تک پہنچایا جہاں فخر زمان 66 رنز بنانے کے بعد آﺅٹ ہوگئے تھے۔میچ کے دوسرے دن کھیل کے اختتام تک پاکستان نے 2 وکٹوں کے نقصان پر 144 رنز بنا لیے تھے اور انہیں 281 رنز کی برتری حاصل ہوگئی تھی۔