کاشتکار کٹائی کے بعد دھان کے مڈھوں کو آگ نہ لگائیں،ڈائریکٹر زراعت

جمعہ 19 اکتوبر 2018 20:20

فیصل آباد۔19 اکتوبر(اُردو پوائنٹ اخبارتازہ ترین - اے پی پی۔ 19 اکتوبر2018ء) ڈائریکٹر زراعت چوہدری عبدالحمید نے دھان کے کاشتکاروں سے کہا ہے کہ وہ کٹائی کے بعد دھان کے مڈھوں کو آگ نہ لگائیں۔انہوں نے کہا کہ مڈھوں کو آگ لگانے سے زمین کی بالائی سطح پر موجود نامیاتی مادہ کو ناقابل تلافی نقصان پہنچتا ہے اور فضائی آلودگی میں بھی اضافہ ہوتا ہے ۔

(جاری ہے)

انہوں نے کہا کہ دھواں سموگ کا باعث اور ٹریفک حادثات وانسانی جانوں کے ضیاع کا بھی سبب ہے۔انہوں نے کاشتکاروں سے کہا کہ مڈھوں کی تلفی کیلئے روٹا ویٹریا ڈسک ہیرو کی مدد سے انہیں زمین میں ملادیں یا گہرا ہل چلا کر آدھی بوری یوریافی ایکڑ چھٹہ کرکے پانی لگا دیا جائے۔انہوں نے کہا کہ دھان کے مڈھوں کو زمین میں ملانے سے زمین کی زرخیزی اور پیداواری صلاحیت میں اضافہ ہوجاتا ہے لہذا محکمہ زراعت کے مشوروں پر عملدرآمد کویقینی بنایا جائے۔انہوں نے کہا کہ مزید معلومات ورہنمائی کے لئے محکمہ زراعت توسیع کے دفاتر سے رابطہ بھی کیاجاسکتا ہے۔