جاپان اور بھارتی فوج اپنی پہلی مشترکہ مشقوں کا آغاز27اکتوبرسے کریں گی

یہ مشقیں گزشتہ سال ستمبر میںجاپان بھارت سربراہ اجلاس میںہونے والے اتفاق کی بنیاد پر ہو رہی ہیں

ہفتہ 20 اکتوبر 2018 13:00

ٹوکیو(اُردو پوائنٹ اخبارتازہ ترین - این این آئی۔ 20 اکتوبر2018ء) جاپان کی برّی سیلف ڈیفنس فورس اور بھارتی فوج اپنی پہلی مشترکہ مشقوں کا آغاز27اکتوبرسے کریں گی۔جی ایس ڈی ایف کا کہنا ہے کہ دونوں جانب سے تقریباً 30 ,30 اہلکار 27 اکتوبر سے 18 نومبر تک ایک بھارتی مرکز میں مشقیں کریں گے۔ انسدادِ دہشت گردی کے آپریشن، گھریلو ساختہ بموں سے نمٹنے اور یرغمالیوں کو چھڑانے کی سرگرمیوں پر توجہ مرکوزکی جائے گی۔

(جاری ہے)

یہ مشقیں گزشتہ سال ستمبر میں جاپان بھارت سربراہ اجلاس میںہونے والے اتفاق کی بنیاد پر ہو رہی ہیں۔ ان کا مقصد چین کی جارحانہ بحری سرگرمیوں کے تناظر میں دونوں ملکوں کے تعاون کو نمایاں کرنا ہے۔جی ایس ڈی ایف کے یونٹس کو اب اپنے دیرینہ سلامتی شراکت دار امریکا کے علاوہ بھی دیگر ممالک کے دستوں کے ساتھ تربیت کے بڑھ چڑھ کر مواقع مل رہے ہیں۔رواں ماہ کے اوائل ہی میں اس نے جاپان میں برطانوی آرمی کے ساتھ پہلی مشقیں کی تھیں۔