لاہور: تجاوزات کیخلاف آپریشن میں 3757 کنال اراضی واگزار کرائی گئی، رپورٹ

واگزار اراضی کی مالیت 16 ارب 8 کروڑ 70 لاکھ روپے ہے، ترجمان ضلعی انتظامیہ

ہفتہ 20 اکتوبر 2018 16:20

لاہور(اُردو پوائنٹ اخبارتازہ ترین - آن لائن۔ 20 اکتوبر2018ء) شہر میں تجاوزات کے خلاف آپریشن میں مجموعی طور پر 3757 کنال اراضی واگزار کرائی گئی۔ضلعی انتظامیہ نے لاہور میں تجاوزات کے خلاف جاری آپریشن میں واگزار کرائی گئی اراضی سے متعلق رپورٹ جاری کردی جس کے مطابق مجموعی طور پر 3 ہزار 757 کنال واگزار کرائی گئی اراضی کی مالیت 16 ارب 8 کروڑ 70 لاکھ روپے ہے۔

(جاری ہے)

ترجمان ضلعی انتظامیہ کے مطابق آپریشن میں لاہور ڈیولیپمنٹ اتھارٹی کی 182 کنال، محکمہ جنگلات کی 354 کنال اور رنگ روڈ اتھارٹی کی 663 کنال اراضی سے قبضہ چھڑایا گیا۔ترجمان نے مزید بتایا کہ آپریشن کے دوران ریونیو کی 2556 کنال اراضی اور نیشنل ہائی وے اتھارٹی کی 2 کنال جگہ کو واگزار کرایا گیا ہے۔ترجمان کا کہنا ہیکہ لاہور کی پانچوں تحصیلوں میں تجاوزات کے خلاف آپریشن جاری ہے۔