بھارت، الٰہ آباد کے بعد شملہ کا نام تبدیل کرنے کی تیاری

پیر 22 اکتوبر 2018 13:12

نئی دہلی(اُردو پوائنٹ اخبارتازہ ترین - اے پی پی۔ 22 اکتوبر2018ء) بھارتی ریاست ہماچل پردیش کی مقامی حکومت نے کے دارالحکومت شملہ کا نام تبدیل کرنے کی تیاری شروع کر دی۔ بھارتی خبررساں ادارے کے مطابق ریاست ہماچل پردیش کے وزیر اعلیٰ جے رام ٹھاکر نے شملہ میں منعقدہ ایک تقریب میں خطاب کرتے ہوئے کہا کہ انگریزوں کی حکومت سے قبل شملہ کا نام شیاملہ تھا اور قدیم نام بحال کرنے کے لئے ہماچل پردیش کی حکومت عوام سے رائے طلب کرے گی۔

(جاری ہے)

اتر پردیش حکومت کی جانب سے الٰہ آباد کا نام تبدیل کرنے کے بعد ہماچل پردیش کے وزیر صحت وپن پرمار نے کہا کہ نام تبدیل کرنے سے کوئی نقصان نہیں ہوگا۔ واضح رہے کہ شملہ 1864ء سے ہندوستان کی آزادی تک ملک کا گرمائی دارالحکومت رہا۔شملہ کا نام تبدیل کرنے کا مطالبہ وشوا ہندوپریشد برسوں سے کرتی چلی آرہی ہے لیکن 2016ء میں ریاست کے وزیر اعلیٰ ویر بھدر سنگھ نے اس مطالبہ کو یہ کہہ کر مسترد کردیا تھا کہ شملہ بین الاقوامی حیثیت کا حامل شہر ہے۔