عوام کو ریلیف فراہم کرنے کیلئے صوبہ بھر میں اراضی ریکارڈ سینٹرز کی تعداد میں اضافہ ناگزیر تھا‘ملک محمد انور

لاہور(اُردو پوائنٹ اخبارتازہ ترین - این این آئی۔ 22 اکتوبر2018ء) صوبائی وزیر مال ملک محمد انور نے کہا ہے کہ صوبہ بھر میں اراضی ریکارڈ سینٹرز کی تعداد میں اضافہ ناگزیر تھاکیونکہ عوام کی بڑی تعداد کو مسائل درپیش تھے اور عوام کو ریلیف فراہم کرنے کیلئے محکمہ مال کی جانب سے ایک تجویز بھجوائی گئی تھی ،جسکو وزیراعلیٰ پنجاب نے ایک اعلیٰ سطحی اجلاس میں سراہا اور منظوری دی۔

انہوں نے کہا کہ اس احسن اقدام پر وزیراعلیٰ پنجاب کے شکر گزار ہیں کہ انہوں نے عوامی منصوبہ پر خصوصی دلچسپی دکھاتے ہوئے فوری منظوری دی۔ان خیالات کا اظہار آج صوبائی وزیر نے ڈی جی لینڈ ریکارڈ رائو محمد اسلم سے نیو منسٹر بلاک ،آفس میں ایک ملاقات کے دوران کیا۔صوبائی وزیر نے کہا کہ نئے مراکز کو مرحلہ وار کونگوئی سطح تک لے جایا جائیگا اور پہلے مرحلے میں 102 نئے اراضی ریکارڈ سینٹرز قائم کئے جائیں گے۔

(جاری ہے)

انہوں نے کہا کہ 20نئی موبائل وینز بھی اس مقصد کیلئے استعمال کی جائیں گی تاکہ دور دراز میں بسنے والے لوگوں کو سہولت پہنچائی جا سکے۔ڈی جی راؤ اسلم نے صوبائی وزیر سے کہا کہ وزیراعلیٰ پنجاب نے ہدایت کی تھی کہ نئے اراضی ریکارڈ سینٹرز کی تعمیر کے حوالے سے زمین کی شناخت اور موبائل وین کی خریداری وغیرہ کے معاملات کو جلد حل کر نے کیلئے ایک تکنیکی کمیٹی تشکیل دی جائے ۔صوبائی وزیر ملک انور نے ڈی جی لینڈ ریکارڈ کو ہدایت کی کہ عوامی فلاح کی شاندار منصوبے کے لئے تمام تر بنیادی انتظامات کو یقینی بنایا جائے اور جلد از جلد اس منصوبہ کو مکمل کیا جائے۔