نجی شعبہ برآمدی صنعت کی ترقی کیلئے اپنا کردار ادا کرے،

اسلام آباد ۔ (اُردو پوائنٹ اخبارتازہ ترین - اے پی پی۔ 22 اکتوبر2018ء) صدر مملکت ڈاکٹر عارف علوی نے نجی شعبہ پر زور دیا ہے کہ وہ برآمدی صنعت کی ترقی کیلئے اپنا کردار ادا کرے، اس سے قومی معیشت مستحکم ہو گی۔ ان خیالات کا اظہار انہوں نے فیڈریشن آف پاکستان چیمبرز آف کامرس اینڈ انڈسٹری کے وفد سے گفتگو کرتے ہوئے کیا جس نے پیر کو یہاں چیمبر کے صدر غضنفر بلور کی قیادت میں ان سے ملاقات کی۔

وفد سے گفتگو کرتے ہوئے صدر نے کہا کہ بجٹ خسارہ میں کمی کیلئے برآمدات میں اضافہ انتہائی اہمیت کا حامل ہے۔ انہوں نے کہا کہ صنعت کے پھیلائو کیلئے نئے صنعتی زونز کا قیام بہت اہم ہے۔ انہوں نے کہا کہ صنعتی زونز اس طرح قائم کئے جائیں جس سے برآمدی شعبہ کو فائدہ ہو اور مینوفیکچرنگ کے تمام شعبوں کو یکساں مواقع فراہم کئے جانے چاہئیں۔

(جاری ہے)

صدر نے کہا کہ آٹوموبائل انڈسٹری سمیت مقامی مینوفیکچرنگ میں اضافہ سے ملک کو فائدہ ہو گا۔

صدر نے کہا کہ عام آدمی کے فائدہ کیلئے بنائے گئے اداروں کو کرپشن، بدانتظامی اور نااہلی کی وجہ سے بھاری نقصانات کا سامنا کرنا پڑا، ہم سب کو ملک کو ترقی اور خوشحالی کی راہ پر گامزن کرنے کیلئے ایمانداری، اخلاص اور عزم کے ساتھ کام کرنا ہو گا۔ انہوں نے کاروباری طبقہ پر زور دیا کہ وہ ملک میں ٹیکس کلچر کے فروغ کیلئے اپنا کردار ادا کرے اور کہا کہ کاروباری طبقہ کو مزید ریونیو پیدا کرنے کیلئے ٹیکس ادا کرکے ملک کے صحت، تعلیم اور سماجی شعبوں کو مضبوط بنانے میں مدد کرنی چاہئے۔