جنوبی کوریا، تیسری سہ ماہی کی پٹرولیم مصنوعات کی برآمد میں 4.9 فیصد اضافہ

منگل 23 اکتوبر 2018 17:21

سیئول ۔ (اُردو پوائنٹ اخبارتازہ ترین - اے پی پی۔ 23 اکتوبر2018ء) جنوبی کوریا نے کہا ہے کہ رواں سال کی تیسری سہ ماہی کے دوران اس کی تیل اور اس سے متعلقہ اشیاء کی برآمد میں 4.9 فیصد اضافہ ہوا جو کسی بھی سہ ماہی کی بلند ترین سطح ہے جس کی وجہ طلب اور نرخوں میں اضافہ ہے۔

(جاری ہے)

وزارت صنعت کی جانب سے جاری جائزہ رپورٹ کے مطابق جولائی سے ستمبر کے دوران ملک کی چار ریفائنریوں بشمول ایس کے انرجی، جی ایس کالٹیکس، ایس آئل اور ہنڈائی آئل بینک کی پٹرولیم مصنوعات کی برآمدات کا حجم 128.29 ملین بیرل رہا جو 2017 ء کے اسی عرصے کے مقابلے میں 4.9 فیصد زیادہ ہے۔

سہ ماہی کے دوران پٹرولیم و متعلقہ مصنوعات کی برآمد کا مالی حجم 10.92 ارب ڈالر رہا جو 2017 ء کی تیسری سہ ماہی کے مقابلے میں 45.2 فیصد زیادہ ہے۔سہ ماہی کے دوران سب سے زیادہ پٹرولیم مصنوعات 28.33 ملین بیرل چین کو برآمد کی گئیں جو کل پٹرولیم برآمدات کا 22 فیصد ہیں۔دوسرے نمبر پر تائیوان رہا جس کا پٹرولیم مصنوعات کی برآمد میں حصہ 16 فیصد رہا۔جاپان کو 11 فیصد، آسٹریلیا کو 8 فیصد اور سنگا پور کو کل پٹرولیم مصنوعات کا 7 فیصد حصہ برآمد کیا گیا۔