گورنرسندھ عمران اسماعیل سے میئر حیدرآباد طیب حسین کی ملاقات

قومی ترقی میں حیدرآباد کے کردار، شہر کی ترقی وخوشحالی کے ترقیاتی منصوبوں، بلدیاتی نظام کی کارکردگی سمیت اہمیت کے حامل دیگر امور پر تبادلہ خیال

منگل 23 اکتوبر 2018 17:59

گورنرسندھ عمران اسماعیل سے میئر حیدرآباد طیب حسین کی ملاقات

کراچی (اُردو پوائنٹ اخبارتازہ ترین - این این آئی۔ 23 اکتوبر2018ء) گورنرسندھ عمران اسماعیل سے میئر حیدرآباد طیب حسین نے گورنرہائوس میںملاقات کی ۔ ملاقات میں قومی ترقی میں حیدرآباد کے کردار، شہر کی ترقی وخوشحالی کے ترقیاتی منصوبوں، بلدیاتی نظام کی کارکردگی ، عوامی سہولیات کے ضمن میں اٹھائے گئے اقدامات اور اہمیت کے حامل دیگر امور پرتفصیلی تبادلہ خیال کیا گیا ۔

اس موقع پر گورنرسندھ نے کہا کہ حیدرآباد ایک قدیم ترین شہر ہے ، قومی ترقی میں شہر کے کردار کو فراموش نہیں کیا جا سکتا ہے ، عرصہ دراز سے شہر کے ترقیاتی منصوبے التواء کا شکار ہونے کے باعث عوام مشکلات کا شکار ہیں ، وزیرا عظم پاکستان کا وژن پورے ملک کی یکساں ترقی ہے اس ضمن میں حیدرآباد کے دیرینہ مسائل کے حل کے وفاقی حکومت ہر ممکن تعاون کرے گی ، صوبہ کے دوسرے بڑے شہر میں آبادی کے تناسب سے ترقیاتی کام وقت کی اہم ضرورت ہے ۔

(جاری ہے)

ملاقات میں میئر حیدرآباد طیب حسین نے حیدرآباد شہر کی ترقی و خوشحالی میں گورنرسندھ کی بھرپو ر دلچسپی پر ان کا شکریہ ادا کرتے ہوئے کہا کہ طویل عرصہ سے حیدرآباد کے مسائل کم ہونے کے بجائے مزید بڑھ چکے ہیں ، حیدرآباد کے مکینوں کو موجودہ حکومت با الخصوص وزیر اعظم پاکستان عمران خان سے بڑی توقعات وابستہ ہیں ۔