گورنرسندھ عمران اسماعیل سے ایئر وائس مارشل احسن رفیق چوہدری کی ملاقات

کراچی (اُردو پوائنٹ اخبارتازہ ترین - این این آئی۔ 07 نومبر2018ء) گورنرسندھ عمران اسماعیل سے ایئر آفیسر کمانڈنگ سدرن ایئر کمانڈ ایئر وائس مارشل احسن رفیق چوہدری نے گورنرہائوس میں ملاقات کی ۔ ملاقات میں پاک فضائیہ کے اقدامات ، آپریشنل تیاریوں ، فضائی سرحدوں کی حفاظت کے لئے عصر حاضر کے تقاضوں کے مطابق ڈھالنے سمیت اہمیت کے حامل دیگر امور پر تبادلہ خیال کیا گیا ۔

اس موقع پر گورنر سندھ نے کہا کہ پاک فضائیہ ہر قسم کے چیلنجز سے نبر د آزما ہونے کی بھرپور صلاحیت رکھتی ہے پوری قوم کو اپنی پاک فضائیہ پر فخر ہے ، فضائی سرحدوں کے محافظ ادارہ کو عصر حاضر کے تقاضوں سے ہم آہنگ کرنے کے لئے موجودہ حکومت ہر ممکن تعاون جاری رکھے گی ۔ ملاقا ت میں ایئر وائس مارشل احسن رفیق چوہدری نے کہا کہ پاک فضائیہ قوم کی توقعات پر پورا اترنے کی بھرپور صلاحیت رکھتی ہے ، فضائی سرحدوں کی حفاظت کے لئے پاک فضائیہ چاق و چوبند ہے ،ہر قسم کے چیلنجز سے نبرد آزما ہونے کی بھرپور صلاحیت حاصل کرلی ہے ۔

(جاری ہے)

دریں اثناء گورنرسندھ عمران اسماعیل سے گورنرہائوس میں فلائنگ آفیسر مریم مختار کی والدہ ریحانہ مختار نے ملاقات کی ۔ ملاقات میں گورنرسندھ نے کہا کہ مریم مختار نے جام شہادت نوش کرکے ایک عظیم مثال قائم کی ہے جسے پوری قوم قدر کی نگاہ سے دیکھتی ہے ، فلائنگ آفیسر وطن عزیز کے دفاع میں بڑھ چڑھ کر حصہ لینے کی شدید خواہش مند تھیں اور اس عظیم مقصد میں انہوں نے شہادت کا اعلیٰ مقام حاصل کیا ۔

ریحانہ مختار نے کہا کہ ان کی صاحبزادی وطن عزیز پر نچھاور ہوگئی ہیں جس پر انھیں فخر ہے ، شہید بیٹی کا پاک فضائیہ میں شامل ہونے کے بعد جذبہ حب الوطنی دیدنی تھا ہمیشہ وطن پر جان نثار کرنے کے عزم کا اظہار کرتی رہتی تھی ، اللہ تعالیٰ نے اس کی اس خواہش کو پایہ تکمیل پر پہنچادیا ، شہید کی ماں کہلانا میرے لئے کسی اعزاز سے کم نہیں ۔