مہران انجینئرنگ یونیورسٹی جامشورو کا برطرف نوجوان ملازم روڈ حادثے میں جاں بحق ہو گیا

جمعرات نومبر 22:06

حیدرآباد(اُردو پوائنٹ اخبارتازہ ترین۔ 08 نومبر2018ء) مہران انجینئرنگ یونیورسٹی جامشورو کا برطرف نوجوان ملازم طارق علی میمن روڈ حادثے میں جاں بحق ہو گیا، متوفی نے اپنی بحالی کے لئے ہائیکورٹ میں پٹیشن دائر کر رکھی تھی۔

(جاری ہے)

عاقل پلازہ پھلیلی کا رہائشی 35 سالہ طارق میمن بیروزگار تھا جس کے باعث کریم میں موٹر سائیکل رائیڈر تھا، وہ بدھ کو سواری چھوڑ کر آتے ہوئے بڈھانی تھانہ کی حدود نیشنل ہائی وے پر ٹرالر کی زد میں آکر موقع پر جاں بحق ہو گیا، لاش سول ہسپتال منتقل کی گئی اور پوسٹ مارٹم کے بعد ورثاء کے حوالے کردی گئی، طارق میمن کے گھر صف ماتم بچھی ہوئی تھی، نماز جنازہ کی ادائیگی کے بعد مقامی قبرستان میں سپردخاک کر دیا گیا، متوفی گھر کا واحد کفیل تھا۔

طارق میمن نے اپنی برطرفی کے خلاف سندھ ہائیکورٹ میں پٹیشن بھی دائر کر رکھی تھی اور دوروز قبل ہی عدالت عالیہ نے وی سی مہران یونیورسٹی کو ایک ماہ میں اس سلسلے میں فیصلہ کرنے کا حکم دیا تھا، افسوس طارق میمن ملازمت پر بحالی کی حسرت دل میں لئے دنیا سے رخصت ہو گیا۔