بھارتی فورسز نے سرینگرکے وسط میں واقع ایک پارک میں فوجی بنکر قائم کردیا

1990کی دہائی کے بعد سے یہ پہلا موقع ہے جب کسی پبلک پارک میں کوئی فوجی بنکر قائم کیا ہے

پیر 12 نومبر 2018 11:40

سرینگر(اُردو پوائنٹ اخبارتازہ ترین - این این آئی۔ 12 نومبر2018ء) مقبوضہ کشمیرمیں بھارتی فورسز نے سرمائی دارلحکومت سرینگر کے وسط میں واقع پرتاپ پارک میں ایک بنکر قائم کیا ہے اور اسے کسی اور مقام پر منتقل کرنے سے انکار کررہی ہے ۔ کشمیرمیڈیاسروس کے مطابق شہر کے وسط میں واقع پرتاپ پارک جو شہر کی خوبصورتی میں اضافہ کرتا ہے کو ستمبر 2014کے تباہ کن سیلاب کے بعد جون 2016میں عوام کیلئے دوبارہ کھولا گیا تھا تاہم بھارتی فوج نے اب یہاں بھی اپنا بنکر قائم کردیا ہے جس کی وجہ سے لوگوں کو شدیدمشکلات کا سامنا ہے ۔

پارک میں تعینات محکمہ باغبانی کے ایک عہدے دار نذیر احمد نے بتایا کہ کوٹھی باغ پولیس اسٹیشن سے وابستہ اہلکار وںنے صرف آٹھ سے دس دنوں کیلئے یہ بنکر قائم کیاتھا تاہم اب وہ اسے خالی کرنے سے انکار کر رہے ہیں ۔

(جاری ہے)

انہوںنے کہاکہ 1990کی دہائی کے بعد سے یہ پہلا موقع ہے جب کسی پبلک پارک میں کوئی فوجی بنکر قائم کیا ہے ۔ انہوںنے کہاکہ محکمہ باغبانی کے اعلیٰ حکام کو اس بارے میں آگاہ کیاگیا تاہم بنکر کو پارک سے ہٹایا نہیں جاسکا۔ پارک کی سیر کو آنے والے ارشاداحمد نے بتایا کہ بھارتی فورسز کو عوامی مقامات پر فوجی بنکر نہیں قائم کرنے چاہئیں۔ انہوںنے کہاکہ پارکوں میں فوجی بنکر وںکی تعمیر سے پارک کی سیر کو آنیوالے لوگوں کی زندگیوں کو خطرہ لاحق ہو سکتا ہے ۔