اداکار سورج پنچولی نے اداکارہ جیا خان کی خودکشی پر خاموشی توڑ دی

کسی کو بدترین سمجھنا بہت آسان ہے مگر خود کو بے گنا ثابت کرنا بہت مشکل ہے جب یہ کیس شروع ہوا تو میں بہت کم عمر تھا اور زندگی کو سمجھنے کی کوشش کررہا تھا

پیر نومبر 11:40

ممبئی (اُردو پوائنٹ اخبارتازہ ترین۔ 12 نومبر2018ء) بولی وڈ اداکار سورج پنچولی نے اپنی سابق گرل فرینڈ اور اداکارہ جیا خان کی مبینہ خودکشی کے معاملے پر برسوں بعد خاموشی توڑ دی ہے۔خیال رہے کہ جیا خان نے 2013 میں خود کو پھندہ لگا کر خودکشی کرلی تھی اور اپنے آخری خط میں سورج پنچولی پر زندگی تباہ کرنے کا الزام عائد کیا تھا۔ سورج پنچولی نے انسٹاگرام پر ایک طویل پوسٹ میں اپنے خلاف 2013 سے چل رہے جیا خان خودکشی کیس پر بات کی۔

اداکار کے خلاف رواں سال کے آغاز میں جیا خان کی خودکشی پر فرد جرم عائد کی گئی تھی۔سورج پنچولی نے لکھا کہ وہ اس بارے میں کیس کے خاتمے پر بات کرنا چاہتے تھے مگر چونکہ مقدمہ توقعات سے زیادہ لمبا ہوگا تو انہوں نے اپنے خیالات سوشل میڈیا پر شیئر کرنے کا فیصلہ کیا۔

(جاری ہے)

اداکار کا کہنا تھا کہ انہوں نے عدالت میں مقدمے کا سامنا تحمل اور احترام سے کیا، انہیں ایک قاتل، مجرم اور تشدد کرنے والا کہا گیا، جس نے انہیں اور خاندان کو افسردہ کردیا، مگر توقع ہے کہ مقدمے کا اختتام انصاف کے ساتھ ہوگا۔

اداکار نے اس مشکل میں ان کا ساتھ دینے الوں کا شکریہ ادا کرتے ہوئے کہا کہ جب یہ کیس شروع ہوا تو وہ بہت کم عمر تھے اور زندگی کو سمجھنے کی کوشش کررہے تھے میں کسی کو برا بھلا کہنے پر الزام نہیں دے سکتا کیونکہ میڈیا نے انہیں میری شخصیت کو ایسے ہی دکھایا تھا، مگر میں عفریت نہیں جیسا مجھے دکھایا جاتا ہے، میں جانتا ہوں کہ کسی کو بدترین سمجھنا بہت آسان ہے مگر خود کو بے گنا ثابت کرنا بہت مشکل ہے کیونکہ اس کے لیے ایک طریقہ کار پر عمل کرنا ہوتا ہے۔

ان کے بقول اس مقدمے کے حوالے سے الزامات اور تصورات ہیں مگر انہیں ثابت نہیں کیا جاسکا، میں ہمیشہ سے اپنے والدین کو سرخرو کرنا چاہتا تھا، میں ہمیشہ سے ایک اچھا بیٹا بننے کی کوشش کرتا رہا ہوں اور گزشتہ 6 سال کے دوران میں نے اس خواب کی تعبیر کے لیے ہر ممکن کوشش کی ہے۔