سونالی بیندرے نے شادی کی 16 ویں سالگرہ کے موقع پر شوہر گولڈی بہل کیلئے جذباتی پیغام جاری کردیا

ممبئی (اُردو پوائنٹ اخبارتازہ ترین - این این آئی۔ 13 نومبر2018ء) کینسر کے مرض میں مبتلا بالی ووڈ اداکارہ سونالی بیندرے نے اپنی شادی کی 16 ویں سالگرہ کے موقع پر شوہر گولڈی بہل کے لیے جذباتی پیغام جاری کردیا۔اداکارہ سونالی بیندرے اور فلم ساز گولڈی بہل کی شادی کو13نومبر کو 16 سال مکمل ہوگئے، اس موقع پر انہوں نے سوشل میڈیا پراپنے شوہر کے لیے ایک جذباتی پیغام شیئر کیا ہے ۔

بھارتی اخبار این ڈی ٹی وی کے مطابق اداکارہ سونالی بیندرے نے سماجی رابطے کی ویب سائٹ انسٹاگرام پر اپنے جیون ساتھی گولڈی بہل کے لیے شادی کی 16 ویں سالگرہ کے موقع پر جذباتی پیغام جاری کیا ہے، جس میں ان کا کہنا ہے کہ جیسے ہی میں نے لکھنا شروع کیا، میں نے فوری طور پر جان لیا کہ میں اپنے جذبات اور خیالات کو اٴْس طرح الفاظ میں نہیں ڈھال سکتی جیسے میرے دماغ میں چل رہا ہے۔

(جاری ہے)

انسٹاگرام پر سونالی بیندرے نے گولڈی بہل کے ساتھ اپنی کچھ تصاویر شیئر کی ہیںجن میں ایک ان کی شادی کی تصویر بھی شامل ہے اور ساتھ ہی مزید لکھا کہ شادی میاں بیوی دونوں سے چلتی ہے پھر چاہے جیسے بھی حالات ہوںاور خدا جانتا ہے کیسے ہم نے یہ پورا سال گزرا ہے۔ لوگوں کواس بات کا بھی بخوبی اندازہ ہوگا کہ کینسر جیسی بیماری سے اکیلے نہیں لڑا جاسکتا ،ْیہ وہ بیماری ہے جس میں ایک خاندان کا مجموعی طورپر ہونالازمی ہے۔

سونالی بیندرے کے اس پوسٹ پر اداکارہ پریانکا چوپڑا، شیوتا بچن، ایشمان کھرانہ، نیہا دھوپیا اور سوزین خان نے انہیں شادی کی سالگرہ کی مبارک باد دی ہے۔واضح رہے اداکارہ سونالی بیندرے نے گزشتہ ہفتے دیوالی کا تہوار گولڈی بہل اوراپنے بیٹے رنویر کے ساتھ نیویارک میں منایا تھا جس کی تصویر انہوں نے انسٹاگرام پر شیئر کی تھی۔سونالی بیندر ے نے رواں سال جولائی میں سوشل میڈیا پر پیغام کے ذریعے بتایا تھا کہ انہیں ہائی گریڈکینسر کی تشخیص ہو ئی ہے جو کہ جسم کے دیگر حصوں میںبھی پھیل چکا ہے ۔ انہوں نے معمولی درد کے باعث کچھ ٹیسٹ کروائے تھے جس کے بعد یہ انتہائی حیران کن انکشاف سامنے آیاتھا ۔