وزیر اطلاعات راجہ مشتاق احمد منہاس کی دختران ملت کی سربراہ محترمہ آسیہ اندرابی و دیگرکشمیری خواتین پر نہاد مقدمے میں فرد جرم عائد کرنے کی شدید مذمت

جمعرات 15 نومبر 2018 18:54

مظفرآباد ۔ (اُردو پوائنٹ اخبارتازہ ترین - اے پی پی۔ 15 نومبر2018ء) آزادجموں وکشمیر کے وزیر اطلاعات و سیاحت راجہ مشتاق احمد منہاس نے بھارتی حکام کی جانب سے دختران ملت کی سربراہ محترمہ آسیہ اندرابی سمیت تین کشمیری خواتین کو نام نہاد مقدمے میں فرد جرم عائد کرنے کی شدید ترین الفاظ میں مذمت کی ہے۔وزیر اطلاعات راجہ مشتاق احمد منہاس نے اپنے ردعمل میں کہا کہ بھارتی حکام نے آسیہ اندرابی جیسی جری اور نڈر خاتون کو ڈرانے دھمکانے کی بہت کوشش کی مگر وہ اس میں ناکام رہے۔

(جاری ہے)

انہوں نے کہا کہ آسیہ اندرابی انتہائی جرات سے مقبوضہ کشمیر میں تحریک آزادی کشمیر کا علم بلند رکھے ہوئے ہیں۔انہوں نے آسیہ اندرابی کی جدوجہد کو شاندار الفاظ میں خراج تحسین پیش کرتے ہوئے کہا کہ بھارتی فوج کشمیریوں کا جذبہ حریت کم نہیں کر سکی ہے۔انہوں نے عالمی برادری پر بھی زور دیا کہ وہ کشمیری خواتین کے خلاف بھارت کی معاندانہ پالیسیوں کا نوٹس لے اور ان کے خلاف انسانی حقوق کی سنگین خلاف ورزیوں کا نوٹس لیتے ہوئے بھارت کو اس طرح کی کارروائیاں فوری طور پر ختم کرنے کے لیے مجبور کیا جائے۔